Balaod sa tawo mas daghan kay sa Dios?

Sa balaang kasulatan, napulo ra gyud ka mga sugo ang gilatid sa Diyos nga gihatag Niya ngadto sa bukiran sa Sinai liboan na ka mga katuigan ang milabay gikan karon.

Sayon ra kaayong sabton ang nahisgotang mga kasugoan sanglit diyotay ra man kaayo. Apan ang balaod sa tawo dinhi sa yuta lisod sabton kay hilabihan na kaayo kadaghan nga dili gani ikasulod sa sako sanglit gipatik na man kini sa mga libro.

Ang mga balaod sa tawo mao kini: Criminal law, Civil law, Political law, Remedial law, Labor law, Constitutional law, Commercial law ug Taxation.

Wala pay labot sa mga ordinansa nga gipanday sa atong mga local government units dinhi sa atong nasud.

Dugang pa niini, epektibo lang gihapon ang mga balaod kon Presidential decress ni anhing Presidente Ferdinand E. Marcos bisan og dugay na siyang namatay kaniadtong 1989 didto sa Hawaii.

Hangtod karon, wala pa gihapon ma-repeal ang nahisgotang mga Presidential decress kay giisip na man sila nga tipik ug kabahin sa mga balaod sa atong nasud.

Bisan pa ning tanan, ang atong Kongreso ug Senado nagsigi lang gihapon og panday ug mga balaod bisan sa kadaghan na sa mga balaod sa Pilipinas.

Naunsa man ta? Magpabilin ug magpatuo ba gyud kita sa Diyos nga makagagahum sa tanan nga kitang mga tawo mas labaw pa Kaniya og kinaadman ug kahibalo?

Samtang magsigi pa og tuyok ang kalibutan, mosamot gyud unya sa pagkadaghan ang mga balaod sa kalibotan diin moresulta na kini sa kalibog ug kasamok sa hunahuna sa atong mga katawhan.