Gikasuk-an siya

Niadtong gula sa Banat News sa Abril 16, 2006 maoy unod niining maong lindog ang bahin sa reklamo sa usa ka pumapalit batok sa usa ka tindero og mga lamas nga mopuwesto matag hapon diha sa may eskina sa mga dalan Manalili ug Magallanes. Ang reklamo sa atong texter mao ang timbangan sa maong tindero nga kuwang sa kilohan unya didto pa gayod ibutang ang maong timbangan sa ilawom sa lamesa diin ang tindero ra mismo ang makakita inigkilo o timbang.

Ang walay uwaw nga tindero nakabasa diay sa sumbong sa atong texter ug gikasuk-an niini ang atong texter pinaagi sa text. Pastilan, siya pay naghimog binuang, siya pay masuko. Mora man siyag walay ethics bahin sa negosyo nga iyang gisudlan.

Matud pa sa atong texter: "Naay ni-text nako. Iyang no. 0919-2411889. Nasuko siya kay nireklamo ko dinhi sa Modus bahin sa ilang timbangan nga sila ray makakita inigtimbang. Dili kuno ko angay moreklamo kay gamay ra ang akong gipalit." - 0906-9712412

* * *

Daghang salamat sa imong pag-text pag-usab kanako, higala, kalabot sa imong reklamo bahin sa naasoy nga tindero. Malagmit nga ang nag-text nimo nga nasuko mao mismo ang tindero nga naigo sa imong reklamo.

Kon siya man ang nag-text nimo, klaro kaayong taphaw ra siyag pagsabot mahitungod sa iyang negosyo. Kay alang sa mabuot nga mga negosyante, ma-gamay man o ma-dako ang paliton sa usa ka kustomer, gihatagan kana nila og dakong bili tungod kay sa usa ka paagi o sa lain, nakatabang kini pagpalambo sa ilang negosyo.

Klaro kaayo nga wala siya maghatag og importansiya sa iyang kustomer, kana kon siya man ugaling kadtong nag-text kanimo. Ngano man diay kon gamay ra ang paliton sa kustomer, wala na ba kiniy katungod pagreklamo kon tikasan? Diin god tawon siya makakaplag nianang bokabularyoha?

* * *

Mao nga alang nako, angay gayod kanunayon ang pag-monitor sa mga timbangan diha sa atong kamerkadohan aron masanta ang modus operandi sa tikasan nga mga mamaligyaay. Ug kanang mga tindero nga ibutang sa ilawom sa lamesa ang timbangan, iplastar na kana ninyo sa ibabaw, uy, aron dili magduda ang inyong mga kustomer.

(Sumbong ug reklamo? Text sa 0910-8105522)