Mabuhi ang Pilipino!

Usa ka dakong barko nga susama sa nabantog nga Titanic ang hapit na malunod. Tungod niini nimando ang kapitan sa barko nga kinahanglang mangambak ang mga tawo ngadto sa nagkadaiyang mga life boats. Ang matag lifeboat modala lamang og mga 20 ka mga pasahero. Sa usa ka lifeboat adunay 23 ka mga pasahero, nga sa ato pa, sobra! Kinahanglang moambak ang tulo kanila. Kon dili kini himuon malunod silang tanan. Human sa pila ka mga gutlo nisinggit ang amerikano: "Long Live America!" dungan sa pag-ambak. Dihadiha gitabangan siya sa mga iho. Dayon nisunod ang usa ka Espanyol nga misinggit: "Viva España!" niambak siya ug gipistahan sa mga iho. Ang usa ka Pilipino, mapagarbohon nga usa pud siya ka Kristohanon ang misinggit: "Mabuhi ang Pilipino!" dungan sa pagtuklod sa taga-Vietnam didto sa tubig.

Pamalandong

Ang sukaranan sa paghigugma sa uban dili man ang pulong kon dili diha sa buhat. Kay ang pagtuo kinahanglang mapamatud-an pinaagi usab sa buhat.