Da vinci code

Mo-angkon ko nga usa ko sa minilyon ka mga tawo sa kalibutan nga nakuryuso sa kontrobersyal nga Da Vinci Code nga gisuwat ni Dan Brown niadtong 2003. Apan sa wala pa sugdi ang pagbuhat sa salida, gi-una na nako og basa ang maong 'bestseller' nga libro. Gawas sa akong pagka-kuryuso, dili ko buot nga moabot ang adlaw nga mabutang ang akong pagtu-o sa dakong pagsuway. Mao nga sa dili pa magkagubot ang katilingban tungod sa maong libro ug sa salida mahitungod ini, nga gitakdang ipagawas karong semanaha, mas maayo nang andam nako sa pagtubag ug pag-balanse sa akong pagtuo.

Mutuo ko nga 'fiction' o bunga lang sa hunahuna sa usa ka magsusuwat ang tanang karakter ug mga panghitabo sa maong libro. Apan ang nakapakugang kay gigamit ni Brown si Hesu Kristo aron mas pang maghinamhinam ang usa ka tawo ug ang publiko sa pagbasa sa iyang libro. Ang gibuhat ni Brown maoy tataw nga 'blasphemy' o pagbuling-buling sa panga'n sa Ginoo ug sa pagtuo sa mga Kristyano. Matud ni Brown, opinyon ug bunga lang sa iyang 'writing skills' ang maong libro. Nakalimot siguro si Brown sa paghinuklog kung pila ka mga sumusunod ni Kristo ang masakitan, unsa nga mga institusyon ang matandog ug unsang klaseng pagtuo ang mabutang sa dakong peligro.

Simple lang ang istorya. Gibutyag ni Dan Brown sa novel nga usa ka tawo si Kristo sukwahi sa pagtuo sa mga Kristiyano nga parehong Diyos ug tawo si Kristo. Matud sa libro ni Brown, adunay relasyon si Kristo ug Maria Magdalena ug nanganak sila og usa ka babaye, sukwahi sa pagtuong walay gika-relasyon si Kristo sulod sa trayntay y tres niya katuig nga pagpuyo ning kalibutana. Ang tanang mga rebelasyon, nga matud pa, dugay nang gitaguan sa simbahan, nabulgar sa sikat nga pintor nga Leonardo Da Vinci. Dugang ni Brown sa iyang novel, gipadayag ni Da Vinci ang iyang nahibaw-an pinaagi sa iyang mga sikat nga 'paintings' nga 'The Last Supper' ug "Monalisa'.

Sa unang mga chapters sa novel, dili nimo kalikayan nga kwestyonon ug tan-awon ang duha ka mga paintings aron sa pagmatuod sa pangangkon ni Brown. Apan samtang mopa-ingon kana sa katapusang bahin sa libro, magsugod na ang pagka mabaw sa mga pangangkon ni Brown. Apan dili kalikayan ang pagduwa sa imong huna-huna sa mga sensitibong detalye sa maong libro.

Karong semanaha na gikatakdang ipagawas ang kontrobersyal nga 'movie version' sa librong Da Vinci Code. Sa mga sama nako nga nakabasa sa nobela, wala koy laing motibo nganong buot nakong tan-awon ang salida gawas sa:

Una, pagsukitsukit kung gi-unsa sa 'production staff', gikan sa 'screen writer, director, cinematographer ug uban pa sa paghimo ang 'movie version' sa nobela. Ikaduha, buot nakong tan-awon unsa ang hitsura sa mga lugar nga gibutyag sa libro sama sa Louvre Museum sa nasud nga Pransya kung asa mahimutang ang mga 'painting ni Da Vinci. Ikatulo, gi-unsa sa pagpadayag sa salida ang kinabuhi ni Kristo ug sa giingong relasyon ini kang Maria Magdalena.

Nagpagawas na ang simbahan og pahayag nga dili tan-awon ang maong salida isip protesta sa walay basehang pangangkon ni Dan Brown ug nihagit sa katawhan sa:

Una, pagpalawom sa hibawo sa bala-ang kasuwatan ug tradisyon sa katolikong simbahan diha sa mga panimay, eskwelahan ug mga organisasyon sa simbahan. Ikaduha, ang paghangyo sa mga 'publishers' ug mga sakop sa media sa pag-himo sa ilang mga gimbuhaton sa maki-angayong paagi. Ikatulo, ang pagtamod ug pagrespeto sa mga historians, scholars of the arts ug scientists sa paghimo og kultura nga puno sa integridad.