Bomba ni Tiboy

Dunay grupo sa dagkong negosyante sa Sugbo nga naglaway sa kanindot sa mga luna sa Cebu City Watershed. Nagplano sila pagtukod og subdivision, golf course ug lumbaanan sa kabayo. Magtukod sab silag riles sa cable car nga manukad sa luna ni Cebu City Councilor Gabriel Leyson sa Barangay Taptap.

Kabahin ni sa makapakugang nga mga kasayuran nga gipaulbo ni Heneral Tiburcio Fusilero, ang pangu sa kontrobersiyal nga KEEP (Kantipla Ecosystem Enhancement Program) Foundation, atol sa Kapamilya Media Forum sa SM City Cebu nga gipasiugdahan sa DYAB Abante Bisaya ug Sky Cable.

Matud ni Fusilero niduol niya ang mga negosyante apan iyang gibalibaran ang ilang plano. Nagduda siya nga ang grupo maoy nigamit sa mga mag-uuma aron pagpalagpot niya ug sa KEEP gikan sa Kantipla.

* * *

Ang 504 ektaryas sa Sitio Kantipla sa Barangay Tabunan nga gitugyan ni kanhi DENR Secretary Antonio Cerilles ngadto ni Fusilero ug sa KEEP niadtong 2000 kabahin sa 29,000 ektaryas nga luna nga giproklamar ni kanhi Pres. Corazon Aquino nga watershed area niadtong 1992. Ang atbang nga Mananga watershed ubos sa pagduma sa Cebu Uniting for Sustainable Water (CUSW) nga gipangulohan ni Fr. Margarito Alingasa.

Si Fr. Alingasa, nga nitambong sab sa media forum, niingon nga sama sa KEEP naproblema sila sa padayong pagpamaligya sa hapit tanan nang luna sa Mananga watershed ngadto sa mga negosyante.

Gidasonan niyang kahimangod nilang Fusilero ug Alforque batok sa Cebu City Assessor's Office nga nangluwat sa tax declarations sa mga luna nga di mahimong mabaligya. Si Barangay Kapitan Felix Abella, ang gitugyanan ni Cebu City Mayor Tomas Osmeña pag-imbestigar sa kontrobersiya, nisaad pagsusi unsay papel sa assessor's office sa palusot.

* * *

Si PENRO (Provincial Environment and Natural Resources Officer) Richard Abella nipasalig nga bisan mawa nang grupo ni Fusilero takos silang manalipod sa watershed. Apan si Alforque maisugong nisukwahi pinaagi sa paglitaniya sa mga pagpabaya sa DENR:

• Gipasagdan si Konsehal Leyson nga nigamit sa buldoser sa City Hall pagpatag sa bukid sa iyang luna sa Taptap;

• Gipasagdan ang negosyanteng si Betty Rivero, nga giingong nakapalit luna sa mag-uumang si Marciano Alcantara, pagtukod og bay ug paghimog dan;

• Si Abella nangumbinser sa KEEP nga pasagdan na lang si Rivero aron mahilom nang mga reklamo.

* * *

Si PENRO Abella nipasabot nga wa nila masusi ang kaso ni Leyson kay wa kasumiter si Alingasa sa affidavits sa mga saksi. Wa hinuong katubag dihang akong gipangutana di pa ba diay igo nga ebidensiya ang napatag nga bukid. Si Abella kusganon sang nihimakak nga siyay nangabogar ni Rivero.

Si Fusilero nipasangil nga nakapadaghan sa mga nag-okupar sa Kantipla ang mga botante nga gipanghakot sa mga politiko sa nangaging eleksiyon. Nanganti sab siyang magpaputol sa liog kon kapamatud-ang mga pasangil sa pagpanghasi batok sa iyang pundok.