Daghan gyod!

Niadtong Abril 7, 2006 ato na sab nga gihisgotan dinhi ang bahin sa mga badlongon nga mangilog og bagahe diha sa South Bus Terminal. Sa laing higayon, gibaha na sab og mga text messages ang akong cellphone gumikan sa maong artikulo. Pastilan, daghan na gyod diay ang nabiktima nianang maong mga badlongon sa katilingban diha sa South Bus Terminal.

Tubayan nato kining asoy sa usa ka texter nga nagkanayon: "Good day. Tinuod bitaw nga daghan gyod kaayong mangilog og bagahe nga mga kargador diha sa South Bus Terminal. Nakasulay na mi niana. Iyang ilogon ang among karga pero wala gyod namo gihatag kay gaan ra man kaayo. Pero iya gyod nga gigunitan bisan duol na kaayo mi sa bus. Unya didto niya gibutang ang among bagahe sa bus nga dugay pang molarga. Dayon nangayo siya og P15.00 bisan igo ra siyang nigunit sa bagahe. Isog ra ba kaayo. Dili mosugot kon P10.00 ray ibayad bisan wala siya mahago. Wala mi niya pasakya sa bus nga unang molarga. Didto ikarga ang among butang sa bus uwahing molarga. Nalangan mi." -- 0915-5974774

Base sa asoy niining maong texter, klaro gayod kaayo nga nakahatag og kahasol kanang mga badlongong kargador diha sa South Bus Terminal nga mangilog og bagahe sa mga pasahero. Imbes magdali, mosamot na hinuon ang kalangan sa pasahero kay adto man ikarga sa badlongong kargador ang bagahe niini sa bus nga dugay pang molarga. Nganong dili man nila idiretso ang karga ngadto sa bus nga maoy unang molarga? May na-involve ba niini nga cash-abotan tali sa kargador ug sa bus nga maoy kargahan sa bagahe nga dala niini? Nangutana lang!

Ang nakapait pa gyod kay kining badlongon nga mga kargador mamugos gyod ngadto sa mga pasahero. Kon mobalibad ang pasahero nga siyay modala sa bagahe niini, mamugos gyod paggunit sa bagahe. Take note, gunit lang. Unya pagkahuman, mangayo dayon og P15.00, nga unta klaro man nga wala siya mahago. Dili ra ba gyod kuno mosugot kon P10.00 ray ihatag sa pasahero. Grabe na man sab kini, uy! Manghod na man lang kinig diyotay sa tulis sa atubang!

Kinsa man ang may katungod ug awtoridad sa pagbadlong nianang mga badlongon diha sa South Bus Terminal? Nganong gipasagdan man lang kana sila?

* * *

(Sumbong ug reklamo? Text sa 0910-8105522)