Kon retirado na gani ang kawani entonses magpahayahay o maghayang-hayang na lang siya sa ilang balay.
Apan naunsa mang pagkaunsaa nga daghang mga retirado sa gobiyerno karon nga magsigi lang gihapon og trabaho isip consultant o bisan unsa na lang posisyona basta may backer lang nga politiko.
Gawas sa binulan nga pension, magdawat pa gyud sila og suweldo isip conterminous nga empleyado.
Unya, giuyonan usab kining sistemaha sa Civil Service Commission. Naunsa man ang Civil Service Commission ning puntoha?
Daghang mga civil service eligibles naglatagaw karon ug nahasiril-siril na lang sa pagpangita og kaloklokan sa gobiyerno.
Kon retirado na gani ang usa ka empleyado kinahanglan dili na siya tugtan pa nga makatrabaho sa gobiyerno.
Unsa guy retirado? Aduna bay retirado nga magsigi lang gihapon og wad-wad og trabaho sa gobiyerno?
Magsigi og bantay sa orasan sa bundy clock gikan sa alas-otso hangtod sa alas singko sa hapon.
Kinahanglan hatagan nato og kahigayonan ang uban natong mga kaigsoonan ilabi na sa mga eligibles nga makatilaw usab kon unsay lami sa trabaho sa gobiyerno.
Kinahanglan dili magmika o matulog ba hinoon ning butanga ang Civil Service Commission.
Asa na man niini ang kaangayan ug hustisya? Kinahanglan magbantay ang Civil Service Commission mahitungod niini kay sila man ang gitahasan sa atong balaod sa pag-approve ug sa pag-reject sa mga appointments sa mga kawani sa gobiyerno.