Frame sa santos

Dili na bag-o kining maong estilo sa modus operandi. Nahitabo na kini kaniadto pero nahilom sa makadiyot. Mibalhin lang diay og dapit o puwesto. Karon mibalik na usab kining mga tawhana sa ilang modus.

* * *

Anaa na sila karon magpahipi duol sa Sto. Niño church. Ang estilo mao nga samtang ikaw maglakaw sa may aseras o magbarogbarog sa daplin sa dalan, may usa ka tawo nga moduol kanimo ug motanyag sa frame sa santos nga iya (kunong) ihatag nga libre. Kini gyod ang kasagaran nilang approach ngadto sa ilang prospect.

Kon imong dawaton ang frame nga iyang ihatag, hatagan dayon ka og ballpen ug papel ug ipasulat ang imong ngalan. Human nimo masulat ang imong ngalan, pangayoan ka na og donasyon. Kon wala ikaw ing ikahatag, mamugos gyod. Dili mosugot kon imong iuli ngadto niya ang gihatag niyang frame.

* * *

Dili ra ba mosugot nga P20.00 ray ihatag. Mobungat gyod og kantidad. Tag P50.00 ngadto sa P100.00 gyod. Mao ba kanay donasyon nga may minimum man? May quota, matud pa. Pastilan, pagkadakong binuang niini!

"Masuko ra ba kon P20.00 ra ang ihatag," nagkanayon ang atong texter nga tag-iya sa cellphone number 0919-4463900

Bantayanan kining mga tawhana. Kon tukion, panglingla kining ilang gihimo. Labaw pa hinuon sa nagpalit og frame ang ilang biktimahon. Gilaliman ka nga P50.00 hangtod sa P100.00 man ang pangayoon. Unya ang frame nga ihatag nagkantidad ra og P20.00, matud pa sa atong texter. Dako siyag ginansiya niini pinaagi sa "pamaligya" nga gigamitan og lansis pinaagi sa pag-ingon nga ihatag kini nga libre.

* * *

Diha gihapon sa Sto. Niño, naa usay babaye nga gireklamo kay mokalit lang og duol sa mga lalaki ug babaye nga magkuyog. Walay pupananghid nga mobutang og pin sa sinina sa lalaki ug babaye dayong pangayo og kuwarta. Labing menos, P10.00, matud pa sa atong texter nga tag-iya sa cellphone number 0920-6670158

Mga 50 na ang edad sa maong babaye, matud pa sa atong texter. Mamugos gyod. Maoy sagad nga biktimahon ang mga manag-uyab. Pagbantay kamo niini. Gamiton ra ba (kuno) ang ngalan sa Sto. Niño. Masuko kon dili ka mohatag.

(Sumbong ug reklamo? Text sa 0910-8105522)