Luwas ba ang Sugbo?

Duha ka mga Indonesian national ang nadakpan sa atong kapulisan nga walay mga papeles sa ilang pagpuyo dinhi sa nasud ilabi na dinhi sa Sugbo. Ang pagkasikop sa duha nakapaisa sa kilay ni Mayor Tomas Osmeña kinsa nabalaka nga basin kining duha nga nadakpan kabahin na sa grupong terorista nga gusto nga mohimo og kagubot dinhi sa Sugbo atol sa pagpahigayon sa ASEAN summit karong umaabot Disyembre.

Si Atty. Leobarlo Enad ang hepe sa board of special inquiry sa Bureau of Immigration miangkon nga wala gayod sa record sa ilang buhatan ang mga pangalan sa duha ka Indonesian nga nadakpan. Maoy iyang gituhoan nga didto moagi sa luyo nga bahin sa Pilipinas ang maong mga langyaw. Iya usab nga giangkon nga maglisod sila sa pagmonitor sa mga tawo nga mosulod sa luyo nga bahin sa Pilipinas kana gumikan sa kakulang sa ilang mga personahi.

Ang ako lang pangutana ngadto sa mga taga Bureau of Immigration, dugay naman mo nga nasayod nga adunay mga langyaw nga moagi sa luyo nga bahin sa Pilipinas nganong wa man ni ninyo bantaye pagmaayo? Wa kaha makigkonsabo ang inyong buhatan sa mga human smugglers dinhi sa nasud mao na nga aduna gihapoy makasulod nga mga langyaw nga walay mga papeles?

Si kinsa ug unsa man gayod kaha kining duha ka mga Indonesian nga nadakpan sa atong kapulisan mga turista o mga terorista? Ako lang pahinumdom ngadto sa atong kapulisan ug hukmanan, ayaw ninyo dali-dali-a sa pagbuhi nang duha ninyo ka dinakpang langyaw kon nagplano mo sa pagbuhi niana nila kay basin mapariha na niadtong nadakpang mga sakop sa kidnap for ransom nga wa na mopakita human gipapyansa sa atong hukmanan. Pagka peligro baya kon mga terorista ning mga tawhana unya ato lang buhian.

* * *

Gireklamo ni kanhi General Fusillero ang city assessors office kana gumikan kay nagsige kini sa pagpang-issue ug mga tax declaration sa mga yuta nga ubos sa watershed area. Wa kaha makigkonsabo ang buhatan sa city assessors office sa dakbayan sa Sugbo ngadto sa mga tawo nga mamaligya og yuta nga dili ilaha? Just asking.