Grasya sa bunyag

Ang inosente nilang mga pahiyom, makahuloganong pagtutok sa labing lumo nilang mga mata, makapatandog nga pagkupot sa wa-pa-intawoy-umoy nilang mga tudlo, makapabuak sa kasingkasing nilang mga hilak ug ang balaanon nilang mga dagway nga tinong batobalani sa lunlon nga pag-amuma.

Di hingpit nga mahubit sa mga pung ang himaya nga mohabol nimo nga magsud-ong sa bag-ong mga anghel sa Kristohanong kalibotan. Labi na kay dul-an sa 100 ka bata ang nabunyagan atol sa Binyagang Bayan sa DYAB Abante Bisaya ug ABS-CBN Cebu nga gihimo sa Sacred Heart Church gahapon sa hapon. Silay tinuod nga saad sa way-lama-nga-kalipay sa kinabuhing dayon.

* * *

Si Fr. Dan Delos Angeles, ang tagduma sa Asin ug Kahayag sa DYAB matag Sabado sa hapon, maoy nangu sa batan-ong mga pari nga nagduma sa mabulukong bunyag. Napukaw niyang tanlag sa tanang nanambong sa misa pinaagi sa pag-awhag sa mga ginikanan ug mga nangugos sa pagtutok sa mga bata.

"Duna bay mga bata nga himabaye?," nangutana siya. "Wa!,' nagdungan pagtubag ang mga dagko. "Duna ba nilay sugarol?, nisumpay pagpangutana ang pari. "Wa!"

Ug natangag ming tanan, mga ginikanan, mga maninong ug mga maninang, sa iyang mensahe, "Ang mga bata inosente, way bisan gamay'ng lama sa pagpakasa'a. Nahibawo na mo kinsay mabasol kon motulipsay sila sa tarung nga agianan."

* * *

Kuyog ni Fr. Dan sa pagbendisyon sa mga bata silang Fr. Joy Danao sa Fatima Parish sa Basak, Mandaue City; Fr. Arthur Navales, ang tsirman sa Commission on Youth sa Artsidyosesis sa Sugbo; ug Fr. Andie Mendoza sa Don Bosco. Ang pre-Jordan seminar giduma sa mga layko sa Fatima Parish, inabagan ni Bro. Tereso Bahag sa Isla sa Olango sa Lapu-Lapu City.

Nangu sa mga nangugos silang Cebu City Vice Mayor Michael Rama ug Cebu City First Lady Margot Osmeña. Ang matag bata, nga gikuyogan sa mga ginikanan ug duha ka nangugos, gihatagan og tag-P3,000 nga balor sa gift certificates sa EQ ug gidalitan og makabuhong nga panihapon ug kalingawan sud sa Sacred Heart Center.

* * *

Apil sa mga gibunyagan nagpangedaron na og 24 ug iyang manghod nga teenager na. Gipasabot mi sa ilang mga ginikanan nga "Kristohanon" ang ilang relihiyon kaniadto. Bag-o lang silang nigakos sa mga pagtulon-an sa Simbahang Katoliko maong karon pa nabunyagi ang ilang anak.

Ang labing batan-on 10 pa ka adlaw. Bisan sa iyang kalinghod, maisugong nakalahutay sa kinatibuk-ang kalihokan-gikan sa pre-Jordan sa ala-una pa sa hapon hangtod sa pagtapos na sa kalingawan pasado alas-8 na sa gabii.

Kanindot kon kitang tanan magpabiling gakson sa grasya sa bunyag hangtod sa kahangtoran. Apan nahibawo na tang tanan nga mao ni labing unang mokagiw kon magpadailos na ta ning dangog nga lawog sa mga luhaan.

* * *

Email:leo_lastimosa@abs-cbn.com