Modus ni JN

Usa ka magbabasa niining lindog nga tag-iya sa cellphone number 0927-3664816 ug nagpaila sa ngalan nga Aweng ang nagtaho kanako niining maong estilo sa modus operandi. Bahin kini sa karaan nang modus sa text scam apan hangtod karon nagpadayon pa gihapon. Tingali, nakailad pa gihapon ang mga kulokoy nga naghimo niini maong nagpadayon sila sa maong modus.

* * *

Matud pa ni Aweng, siya mismo ang nakadawat og text scam gikan sa tawo nga nagpailang usa ka abogado nga motubag sa ngalan nga JN (inisyal). Maoy estilo niining maong tawo ang pagpatuo sa iyang prospect nga usa siya ka representative sa usa ka charitable institution. Ngiga, no?

Ang estilo niining tawhana mao ang pag-text ngadto ni bisan kinsa og congratulatory message. Pero aron ma-claim ang premyo, iyang patuohon ang prospek nga kinahanglan kining modeposito og P3,000 sa bangko sa usa ka designated account.

* * *

"I-text lang kuno nako ang akong account ug siya nay bahala," dugang pamahayag ni Aweng sa iyang text kanako. "Di ba klarong pangilad kini?"

Pangilad gyod kini, higala. Maayo gani kay nakabantay ka og wala malingla. Subo lang kaayong palandongon nga daghan pa gihapon ang atong kaigsuonan nga dili aware niining maong modus mao nga nailad sila. Kini ang hinungdan nga nagpadayon pa usab kining maong estilo sa modus. Kay misalir man, maong midaghan ang mga mangingilad. Nahigalam kay epektibo man ang maong modus.

* * *

Kining maong modus operandi maingon ta nga common na kaayo karon. Pero daghan lagi gyod gihapong malingla. Kini tungod ba kaha kay ang kadaghanan kanato nangandoy na lang og kuwarta nga "hulog gikan sa langit" gumikan sa kalisod na sa panahon. Motingkag man god dayon ang atong mga dalunggan kon kuwarta nay hisgotan. Mao gyod kini ang nag-unang hinungdan nga mailad kita sa mga text scam.

* * *

Sa gula sa basahon nga Awake niadtong Hulyo 22, 2004 giingon: "What if you are told that you have won a contest or a prize? Don't get excited--it may be a scam, one that has victimized many."

Sutaa una kon may contest o promo ka ba nga giapilan. Kon wala, imposible gyod nga makadaog ka.

(Sumbong ug reklamo? Text sa 0910-8105522)