Sindikato sa Kantipla

Na-short og P117.590 milyones ang koleksiyon sa Bureau of Customs - Port of Cebu tungod kay nakakolekta lamang kini og P289.452 milyones sa assigned target niining P407.042 milyones.

Sa accomplishment report sa bulan sa Abril nga gisumiter ni Deputy Collector for Assessment Maximo Reyes ngadto ni District Collector Ma. Lourdes Mangaoang, nga ang 28.89 porsiyento nga alkanse sa koleksiyon naggumikan kini sa wala pag-apil sa ilang nakolekta gikan sa importasyon sa National Food Authority.

Ang importasyon sa NFA sa bulan sa Abril miabot og P179.008 milyones kansang pagbayad gi-deferred. Hinuon, sumala pa sa report, ang maong deferred payment nga nakolekta narekord sa bulan sa Abril nga kun makab-ot, ang koleksiyon sa Abril mapun-an og P289 milyones ngadto sa P468 milyones nga mas taas sa target og 15 porsiyento.

Hinuon, ang ahensiya sa adwana midesider nga irekord ang koleksiyon dili sa Port of Cebu kun dili sa Office of the Commissioner nga maoy hinungdan nga wala maapas ang target.

Naglaum hinuon si Reyes nga makab-ot nila ang gidestinong target ning bulan sa Mayo.

* * *

TULOBAGON. Maayong manubag si City Assessor Palermo Lugo niining pagpang-isyu niya og mga tax declarations alang sa mga protektadong yuta sa mga bukirang barangay ning dakbayan nga covered sa National Integrated Protected Area System (NIPAS) law of 2002.

Daghan na ang mga nakapalit og luna diha nga wala gyuy kalibutan nga dili diay mahimong ikabaligya ang maong mga luna, apan ang mga tawo ni Lugo diha sa City Assessor's Office wala gyud mangahas sa pag-inspeksiyon sa luna nga gipang-aplayan og tax declarations.

Ang resulta, bisan yuta sulod sa watershed area, adunay mga pribadong tawo nga nangoral ug nangangkong nanag-iya og luna gamit ang tax declarations nga giisyu ni Lugo.

Maayong masayod ang kadaghanan nga kun protected area gani ang usa ka lugar (sama sa bakhawan, sapa ug watershed) dili gyud kini matitulohan o mapa-isyuhan og tax declarations. Busa, kanang gipang-isyu ni Lugo dakong nullo sukad sinugdanan.

Hala, kadtong nagplanong mamalit og luna sa kabukiran ug kadtong gipamaligyaan na, susiha intawon ninyo ang luna asa mahimutang ug kun wala ba kini masulod sa protected area aron dili ma-usik inyong kuwarta nga sa ngadto-ngadto mabawi ra gihapon sa gobyerno nga dili ikonsiderar inyong kahago ug gasto.

* * *

SINDIKATO. Kagahapon, ang Kantipla Ecosystems Enhancement Protection Foundation, Inc. mipresentar og pipila ka indibidwal nga nakapalit og luna nga mireklamong na-engganyo lamang sila pagpalit tungod sa tax declarations nga giisyu sa City Assessor's Office.

Misamot hinuon akong pagduda nga lawom ang duwa diha sa Kantipla kay mismo diay si Provincial Environment and Natural Resource Officer Richard Abella nag-apil-apil naman sa kasamok diha sa maong lugar.

Kinsa man diay kini si Betty Rivero nga maoy giingong giprotehian ni Abella ug ni Security Service Group chief Mariano Natuel? Sa akong nahibaw-an, kini si Rivero taga Mandaue, apan nganong nakatukod man siya og farm sulod sa protected area? "Tenured migrant" ba kini si Rivero ubos sa NIPAS law?

Nganong libre man kaayo siyang nakasulod sa watershed area nga wala gani madakpi sa DENR ug ni Natuel?

Kagahapon, daghang mga ngalan sa mga adunahan ug mga impluwensiyadong mga Sugboanong negosyante ang milutaw nga nakapanag-iya na og luna sa Kantipla nga ilawom sa watershed.

Walay nadakpang usa. Aw, kinsa man pud tuoy modakop anang mga iladong mga tawo, dili ba Supt. Natuel ug Richard Abella?