EDITORYAL - Laing mahinungdanong kalihukan

Adunay usa ka mahinungdanong nasudnong kalihukan nga gitakdang ipahigayon dinhi sa Sugbo ang wala kaayo makadani og atensyon sa katawhan. Kini mao ang National Marian Congress nga himuon dinhi karong Mayo 19-20.

Ang tigpasiugda sa maong Kongreso mao ang Archiocese of Cebu ug ang Human Life International-Pilipinas. Ang tema sa maong panagtigum mao ang "Mary, Queen of Heaven and Earth, Mediatrix of all Grace."

Ang katuyoan sa maong kongreso mao ang pagpalapad sa kahibalo ug pagsabot sa papel ni Mama Maria sa atong kaluwasang espirituhanon.

Daghan pa, bisan sa mga Katoliko, ang wala kaayo makasabot sa papel nga gidala ni Birhen Maria isip Inahan sa Diyos. Naa pa man ganiy mga tawo nga misalikway kaniya.

Busa mahinungdanon kaayo kining duha ka adlaw nga National Marian Congress kay kini moabli sa dalan ngadto sa pagsabot sa katawhan sa papel ni Mama Maria isip Inahan sa Diyos ug ato usab nga Inahan.