Libreng pagtungha

Pipila ka semana gikan karon tingtungha nausab, apan pipila lang kaha sa mga migradwar sa high school niadtong Marso ang makapadayon pagtungha sa kolihiyo?

Sagad sa mga hinungdan nganong daghan sa mga migradwar sa high school ang dili na makapadayon pagtungha sa kolihiyo mao ang kawad-on, ilabi pa karon nga nagpunay og sulbong ang presyo sa mga produktong petrolyo.

Tungod sa kalisod ang uban mapugos nalang sa pagpangita og trabaho human sa high school. Apan tungod lagi kay kuwang sa edukasyon sagad nga padulngan kon dili magtindira sa department store nga hilabihan intawon kagamay ang sweldo ang uban modangop sa pagkakatabang sa panimay.

Salamat na lang sa malumong kasingkasing ni Engr. Doroteo Salazar, ang tag-iya sa Salazar College of Science and Institute of Technology, kay duna nay kahigayonan ang mga batan-on nga mopadayon pagtungha sa kolihiyo pinaagi sa paghatag og libre nga pagtungha alang niadtong mga kalipikado nga tinun-an.

Ang SCSIT ug ang radio DYLA nagtambayayong paghatag og libreng pagtungha sa bisan unsang kurso nga gitanyag sa maong tunghaan alang sa 30 ka mga kalipikadong tinun-an. Dungan sa launching sa DYLA sa bag-o niining mga tulomanon sugod karong Mayo 15, sunod semana, maangkon sa 30 ka mga palaran nga mga tinun-an ang scholarship certificate gikan sa SCSIT.

Lakip sa bag-ong mga tulomanon nga ilusad sa DYLA karong Mayo 15 mao ang "LINTUNGANAY" nga dumalahon ning inyong ubos nga maglilindog. Inyong mabati sa kahanginan ang maong tulomanon matag adlaw'ng Lunes hangtud sa Huwebes gikan sa alas 9:00 hangtud sa alas 11:00 sa buntag.

Dako ning kahigayonan alang niadtong gustong mopadayon pagtungha apan way ikagasto. Paminaw lang sa radio DYLA sa mga detalye kon unsaon nga kamo makaangkon sa kahigayonan pagdaog sa maong talagsaong promo pagtungha nga libre.

* * *

] Dalaygon ang pagbalibad sa mga sakop sa prosecution panel sa kasong parricide batok ni PBMA supreme leader Ruben Ecleo, Jr. nga makabaton og police escort bisan pa man sa ka seryoso sa hulga sa ilang mga kinabuhi.

Sila si Atty. Fritz Quiñanola ug mga kaubang abogado nga aktibo sa pag-prosecute ni Ecleo nakadawat og mga mensahe sa text ug nanghulga kanila nga dunay dautang mahitabo kon magpadayon sila pagtungha sa husay sa kaso.

Human madawat ang maong mga hulga daling gisab-wag ni Quiñanola ang maong hitabo ngadto sa publiko diin dali sab ni nga gipakaminus sa kampo ni Ecleo. Ang abogado ni Ecleo mihulagway niini nga usa lang ka gimmick aron pagkuha sa simpatiya sa publiko.

Bisan pa og way hulga nga nadawat sila si Quiñanola, ang publiko sayod nang daan nga namiligro gyud ang ilang kinabuhi. Wa malilong nato ang nahitabo ni Atty. Arbet Yongco ug sa mga membro sa banay'ng Bacolod kon giunsa sila pagpatay.

Busa di sab layo ang posibilidad nga mahitabo kini ngadto sa mga membro sa prosecution panel. Apan taliwa niini, padayon ang kaisog nilang Quiñanola ug mga kauban.

Inay nga mahadlok, gibalibaran noon niini ang tanyag pagbaton og police escort. Nakadayeg ko sa rason nila pagbalibad tungod kay mas labaw'ng gikinahanglan sa katawhan ang presensiya sa atong kapolisan diha sa kadalanan aron pagbadlong sa kriminalidad.

Baya naman nang uban nato nga mga opisyal, bisan og way hulga sa kinabuhi hapit na lang magbaton og usa ka batalyon aron mogwardiya kanila.

* * *

[email protected]