Imo kining kinabuhi, Dro. Bibliya kini sa nasud. Maoy hinungdan nga sa ubang kanasuran nga lig-on kaayo ang demokrasya, ug hugot ang nasyonalismo, ila kining pagamatyan.
Of course, kinahanglan usbon ang atong Konstitusyon, apan kinahanglan tun-an kinig maayo, kinahanglan ipatin-aw kinig maayo, dili dali-dalion, ug dili diritsoon lag papirma ang mga tawo aron mahimo ang mga kausaban.
Unsa may usbon? Unsa may mga implikasyon niini nganhi kanatong tanan? Makahatag ba unya nig daghang trabaho? Ngano man? Makapa-wa'a ba unya kini sa mga pagduda nga kitang tanan bakakon, tikasan ug kawatan?
Dili na ba unya ta mamalit og bugas gikan sa ubang kanasuran? Dili na ba unya ta magkinahanglan og mga ukay-ukay aron makabiste tag tarong-tarong? Dili na ba unya ta maputos sa utang? Mouminto na ba unya ang serbisyo publiko? Dili na ba unya ang atong mga doctor mokuhag nursing aron makatilaw usab og dollar?
Ug nganong ato man ning dali-dalion? Aron ba nga ang anaa karon sa gahom, silang nangusog pag-ayo sa cha-cha, by all means, at all costs, mao ra say makapahimos sa mga kausaban nga sila ray nagbuot-buot?
Ingonman, ma-wa'a na ba unya, automatically ang pork barrel nga karon gipangusgan sa mga Kongresista nga usbawan? Kini, ug daghan pang mga pangutana, Dro, nga una ka mopirma kinahanglan matubag.
Sa ato nang giingon, sagrado kaayo ang Konstitusyon, dili kini nato himuong tool aron pagpalambo sa personal ug political natong tingusbawan. Ato una ning ipasabot og maayo, Please!
Mag-door-to-door unya kono sila. Hinaut nga dili nila pilion ang ilang door-to-dooron. Tingali unyag adto ra sila sa mga squatter area, sa mga depressed community, ug sa mga dapit nga sa ilang pagtuo ilang mailad ug mapalit.
Please Sir ug Ma'am, ayaw kini ninyo buhata. Ayaw kamo pagsugot nga himoon kamong kasangkapan sa devilish nilang mga hunahuna ug tinguha. Tabang kamog panalipod sa balaan nga Konstitusyon.
Sutaa unag maayo ang mga repercussion niining mga kausaban nga buot nilang buhaton. Think of the country, not of the people behind cha-cha. Kon ma-kontento mo sa ilang mga katin-awan, Kon sa inyong pagtuo makaayo gyud ni ninyo, then go ahead, bisag mopirma pa mog kadaghan. Ikaw, Dro, pirma sad ka? Nakasabut na diay kag maayo sa imong pirmahan? Ayaw ibaligya ang imong kalag, Dro!
Unya, mangutana ra ba dayon ka Dro, nganong pobre kining atong nasud. Nganong mag-inilogay ang giingong sikat nga Pinoy paggawas sa yuta nilang natawhan, aron lang himoong tig-ilo sa mga langyaw'ng daghan og dolyar. -- Komentaryo? Text 0916-6484650