Naaayon sa manggagawa

MANANAHI si Cheryl sa HPI mula pa noong July 17, 1978. Ang nasabing kompanya ay may Collective Bargaining Agreement (CBA). Sa Sec. I, Article IV ng CBA, nakasaad dito ang sumusunod: Ang mga empleyado o manggagawa na mahihiwalay sa kompanya dahil sa pagbabawas, o kaya’y matatanggal nang walang dahilan o tinanggal dahil sa paghinto ng operation ay makakakuha ng separation na naaayon sa batas. Bibigyan ng kompanya ng separation pay ang mga manggagawa o empleyadong boluntaryong magre-resign ayon sa mga nabanggit na dahilan, at sa mga sumusunod na kondisyon: (a) 1 hanggang 30 taong serbisyo ay babayaran ng 20 araw bawa’t taon ng serbisyo; (b) 16-20 taon ay babayaran ng 15 days kada taon ng serbisyo; (c) 11-15 taon -— 10 araw kada 1 taon ng serbisyo; at (d) 5-10 taon — 5 araw bawa’t taon ng serbisyo.

Noong August 10, 1998 o makaraan ang higit na 20 taon ng serbisyo, boluntaryong nag-resign si Cheryl epektibo ng September 17, 1998. Tinanggap naman ito ng kompanya at binayaran siya ng kanyang huling suweldo, 13th month pay at cash para sa mga vacation at sick leave na hindi niya nagamit. Pagkaraan ay nagpadala si Cheryl ng sulat sa HPI upang hilingin na bayaran siya ng separation pay na nakasaad sa Sec. 1, Article IV ng CBA. Ngunit hindi ito binayaran ng HPI dahil sabi nila, ayon sa Labor Code, ang empleyadong boluntaryong nag-resign ay hindi naman daw dapat bayaran ng separation pay. Tama ba ang HPI?

MALI. Totoong sa ilalim ng Labor Code, ang empleyadong boluntaryong nag-resign ay hindi makakatanggap ng separation pay. Ngunit kung ito ay nakasaad sa kontrata ng empleyado, o bahagi ng patakaran ng kompanya o ng CBA o kaya’y pinahihintulutan ng nag-empleyo; dapat lang siyang bayaran. Sa kasong ito, malinaw na binanggit ng CBA na ang isang empleyado o manggagawa ay makakatanggap ng separation pay kapag siya’y boluntaryong nag-resign ng walang anumang dahilan. Kaya dapat bayaran si Cheryl ng separation pay (Hanford Philippines vs. Joseph, G.R. 158251, March 31, 2005 454 SCRA 786).