Unsa kining mga satellite offices sa Piskaliya?

Niining pipila ka mga semana, nagsige kitag suroysuroy sa probinsiya aron matukod kining mga giingon nga Satellite Offices sa opisina sa piskaliya. Ang katuyoan niini mao nga maduol na ang mga piskal sa mga lungsoranon.

Sa ato man gud nga set-up karon, ang piskaliya anaa lamang nahimutang sa Kapitolyo. Apan ang kasagaran sa mga kaso sa korte anaa sa mga lungsod. Mao bitaw nga gastoso kaayo alang sa mga reklamante, mga pulis, mga akusado, mga testigo ug kaparyentehan kay magbyahe-byahe man gyud kada patawag sa piskal.

Aduna nay Satellite Office sa mga lungsod sa Bogo ug Oslob. Kadtong gustong magpanotaryo o mo-follow-up og kaso pwede nang moadto sa mao natong mga opisina sa kalungsoran sa mga adlaw nga gitagana sa piskal. Inabagan sa Regional State Prosecutor, sa Integrated Bar of the Philippines ug sa Hunta Probinsyal sa Sugbo, mahimo na tingali unya nga idirekta pagpasaka ang kasong kriminal niining maong mga opisina, kon mahatag ang atong hangyo sa Department of Justice nga mahimo nang aprobahan sa assistant nga piskal ang sumbong.

Kaniadto, kon duna gani krimen nga mahitabo sa lungsod, gilayon dakpon sa polis ang suspetsado ug pasakaan og kaso sa Municipal Trial Court, kinsa mopagawas dayon og Commitment Order aron matanggong ang suspetsado didto sa lungsod. Sa ingon nga paagi, aduna pay purohan nga magpasayloay ang mga hingtungdan. Kon ugaling dili kana mahitabo, ang imbestigasyon adto ra himoa sa lungsod busa dili na kaayo makalangan sa mga sinumbong ug nagsumbong, lakip na sa mga testigos sa duha ka habig ug sa mga polis.

Sugod niadtong Oktubre 3, 2005, gibag-o sa Korte Suprema ang paagi sa pag-imbestigar sa kaso, kay inay adto ang imbestigasyon sa Municipal Trial Court, sa pagka karon gitugyan naman ang maong responsibilidad sa piskaliya. Tungod niini, ang mga suspetsado madiretso lang og kabalhog sa provincial jail diri sa siyudad. Tungod usab kay nahimo na mang lisod alang sa mga lungsoranon ang pagpasaka o pagtubag sa kaso, gipangitaan nato og paagi unsaon nga medyo magaan-gaan alang sa mga hingtungdan. Mao kini nga nakab-ot ang desisyon pagtukod sa mga Satellite Offices sa mga lungsod diin adunay mga Regional Trial Courts kon RTC.

Ang sunod nga tukoron mao ang sa Barili. Nanghinaot usab kita nga matukod ang sa Toledo City, Danao City ug Talisay City. Kaluoy sa Ginoo natukod kining mga opisinaha bisan sa kakulang sa budget sa Department of Justice, busa dako kaayo atong pasalamat sa mga gobiyernong lokal sa ilang suporta. Tingali ang Sugbo maoy nag-una niini nga mga proyektoha sa tibuok nasud. Mga ginagmay lang kining mga lakang apan among gipanghinaot nga makatabang sa mga lungsoranon aron nga mahiduol sila sa gobiyerno ug magpadayon ang ilang pagsalig sa atong hustisya.

* * *

Alang sa inyong mga opinyon ug reaksyon, palihug e-mail sa [email protected] o text sa 0915-5536986.