Segun sa rekord sa kapolisan ang drayber -- suma pa usab sa sumbong niini -- gihold-ap sa duha ka batan-on ug gikuhaan sa iyang cellphone, cash ug pitaka. Gitionan kuno siyag pusil ug ang maong pusil gikompiska sa polis.
Maayo kaayo -- klaro kaayo -- ang pag-asoy sa drayber sa nahitabo. Apan -- ug mao ning nakaapan -- nagdumili sa pagkiha ang maong drayber dihang nasayran niini nga anak ug pag-umangkon diay sa dakong opisyal sa gobiyerno ang duha ka batan-on nga matud pa niya mitulis kaniya.
Tungod kay mitalaw man ang drayber sa pagkiha, ang duha ka batan-on makalingkawas sa kamot sa balaod.
Kining maong drayber dili angay'ng basolon sa iyang desisyon. Dili lang siya gustog samok. Ug kini iyang katungod. Apan ang maong desisyon makatampo sa pagpalambo sa krimen sa atong dapit.