Mga dispatser sa Jones

Dili ikalimod nga nakahatag gayod og kahasol sa mga PUJ driver ang daghang mga dispatser sa kadalanan sa dakbayan sa Sugbo. Sa tinud-anay god, wala kinahanglana sa mga driver ang serbisyo sa maong mga dispatser. Mosakay ang mga pasahero bisan pag walay dispatser nga manawag kanila.

Matud pa sa pipila ka driver, dako na kaayog matibhang ang mga dispatser sa ilang kinitaan tungod kay dili man lang usa ka dispatser ang 'manghingi' sa usa ka round sa ilang pagbiyahe kondili hasta sa lima ka dispatser ang mangdelehinsiya kanila. Mao pay mahal na ang gasolina, nagdugang pa gyod sa paghasol kanila ang mga dispatser nga walay uwaw!

* * *

Mipadangat og reklamo dinhi sa akong lindog ang duha ka driver og PUJ. Ang una nagmaneho sa PUJ nga 06B ug ang ikaduha nagmaneho sa PUJ nga 06F. Ang ilang gireklamo mao kanang mga dispatser diha sa may Jones, duol sa may skywalk atbang sa Robinsons. Nila pa, dagkong lawas kanang mga dispatser dihang dapita. Magdala og whistle ug bunal. Mangahadlok silang mga driver kay mga isog kaayo.

Matud pa sa mga driver nga mireklamo, kon mahimo pa lang dili na sila mohunong nianang dapita bisan pag naay naghulat nga pasahero tungod sa kadaghan sa mga dispatser nga manghingi nila. Dili man lang god usa ka dispatser ang anaa nianang dapita. Daghan sila ug mangdelehinsiya gayod silang tanan sa driver. Kon magpagahi-gahi paghatag ang driver, hampakon nila sa gibitbit nga bunal ang sakyanan. Mangahadlok god lakip ang mga pasahero.

Ugaling lang kay mapugos gayod sila sa paghunong sa maong dapit kon adunay pasahero nga mokanaog. Niini, dili gayod sila makalikay sa mga dispatser. Bisan walay pasahero nga mosakay pero mangdelehinsiya gayod ang mga dispatser nga dagkog lawas. Mapugos na lang silang mga driver paghatag aron walay gubot.

Subo kaayong palandongon nga gipasagdan lang kanang maong mga dispatser nga makapuwerhisyo sa mga driver. Wala bay gahom ang mga awtoridad sa pagdakop kanila? Kinsa man diay ang mga gahom sa pagpitol nianang mga tawhana? Maayo tingali nga molihok na ang atong mga awtoridad paghimog lakang batok sa mga badlongong dispatser. Hulaton pa ba nilang maunhan sila paglihok sa mga vigilantes? Simbako lang!

* * *

Sumbong ug reklamo? Text sa 0910-8105522)