Apan ang katarong ni Dela Victoria, ang iyang pagka matinud-anon sa serbisyo, inay pagdayeg ug suportar ang iyang maangkon, kamatayon na hinuon ang gisukli niini. Usa ka masakit nga bugti sa iyang walay mansa nga ngalan.
Kon tinuod nga usa ka polis ang nagpatay kaniya, lain na usab kining ngil-ad nga imahe sa kapolisan.
Nagmahal si Dela Victoria sa iyang katungdanan. Apan kini ba ang mabasol sa iyang kamatayon? Kon kita usa ka tinuod nga alagad sa publiko, angay ba diay kitang patyon? Dili ba ang husto nga alalayan kita, dasigon, abagan ug mahalon aron makapadayon kita sa gibarogan natong kawsa alang sa kaayohan sa tanan?
Ang walay binuang nga pagtuman ni Dela Victoria sa iyang trabaho iyang gipakita diha sa kakugi, luyo sa mga hulga nga iyang nadawat gikan sa mga tawo nga iyang gipangligsan.
Simbolo sa katarong si Dela Victoria. Ang mga tawo nga nagpaluyo sa iyang kamatinud-anon sa trabaho nahinugon kaayo sa kalit niyang pagtalikod sa kalibotan. Daghan pa unta siyag mahimo alang sa kaayohan nga panerbisyo. Apan ang mga tawo nga nagdumot kaniya hilom diay nga nangitag igong higayon aron siya pahilomon. Ug nagmalamposon sila. Seguradong naghudyaka sila karon sa kamatayon ni Dela Victoria.
Lisod na pangitaon ang tawo nga sama kaniya nga nagtamod sa katungdanan nga gisangon ug gisalig kaniya sa tumang kaligdong ug katarong. Lisod hitupngan ang kamatinud-anon niya sa serbisyo publiko.