Sulundong bana

Usa ka higala sa biyuda ni Jojo dela Victoria nangadlawon sa Pasil Fish Market sa niaging adlaw aron pagpamalit og isda. Nisuway siyag hangyo kay gimahalan ra sa presyo nga gibungat sa tindera. Gawas nga nibalibad, ang tindera nitambag pa gyod niya nga unya na lang sa sunod semana mamalit og isda kay "patay na si dela Victoria, wa nay manakop, segurong mobarato nang presyo."

Ang salbahis nga tindera sa Pasil wa mag-inusara. Ubang mga negosyante sa isda wa motago sa ilang malipayong panghinaot nga mahibalik nang ilang malipayong mga adlaw sa pagpalusot sa pinabuthang mga isda karong wa na si Jojo. Nagtoo sila nga wa nay mobaraw sa ilegal nilang mga negosyo bisan kinsa pay ipuli ni Jojo.

* * *

Nasayop sila sa paghagit ni Cebu City Mayor Tomas Osmeña. Human pahibaw-a ni Evelyn, asawa ni Jojo, sa insidente sa Pasil, nanawag dayon ang mayor sa iyang mga sinaligan pinaagi sa telepono ug gisugdan ang pagpangita og mga opisyal nga takos nga makapuli ni Jojo isip project director sa Cebu City Bantay Dagat Commission ug Cebu City Market Administrator.

Samtang maglisod ang mayor pagpangita og makahulip sa dagkong mga sapatos nga nabiyaan sa pagkapukan ni Jojo, masaligon kong di niya pakyason ang pangaliya sa mga Sugbuanon nga mapadayon ang bililhong bahandi sa katakos, kakugi ug kaisog ni Jojo pagpanalipod sa katigayonan sa kadagatan. Mahimong magkinahanglan siyag tulo o mas daghan pa aron lang mapadayon ang mga gimbuhaton ni Jojo apan kon ipadayon ang iyang naandang pagpaluyo sa buhi pa si Jojo igo nang garantiya nga mahukasan ang panagang sa kamerkadohan sa dakbayan gikan pagka tam-okanan sa nangalisbong mga bunga sa ilegal nga pangisda.

* * *

Nakugang si Evelyn sa kadaghan sa mga kinabuhi nga nahikap sa iyang bana. Ang kaliboan nga nipahasubo niya mao nay nitug-an sa mga ahensiya sa gobyerno ug pribadong kahugpongan nga natabangan ni Jojo. Nisamot ang iyang gugma ug kahinugon kay bisan sa kadaghan sa mga gimbuhaton sa iyang bana naningkamot gihapon nga sayong makauli sa ilang panimay.

Lahi sa ubang bana nga magpatara na lang kay kapoy na gikan sa trabaho, si Jojo maoy mangunay sa pagluto, paglaba ug paghipos sa basura. Niadto di siyang kasabot sa kadaghan sa atimanon sa iyang bana apan nagkasinabtanay sila pagpasakop nila sa Couples for Christ.

* * *

Apil sa unang nakaduaw sa haya mao ang mga madre ug ang mga ilong tuwapos sa Asilo dela Milagrosa ug kaparian ug mga bata sa Don Bosco, apil sa daghang kahugpongan nga gihatagan ni Jojo sa nasakmit nga pinabuthang mga isda.

Dihang gikantahan sa inosenteng mga bata ang haya sa iyang bana, nahibawo si Evelyn nga malipayong naminaw si Jojo gikan sa gamay'ng luna sa langit nga iyang nahimutangan.

Email:[email protected]