Buslot sa lansis ni Ocampo

Alang sa mga higala ug nagpakaila personal ni SPO1 Marcial Ocampo lisod katoohan nga siya maoy responsabli pagpatay ni Bantay Dagat Commission project director ug market administrator Elpidio"jojo" de la Victoria. Kini tungod kay mahulagway nga hilomon ug "talawan" ang maong polis.

Nagka-ila mi ni Ocampo niadtong nadistino pa ko pagcover sa kalihokan sa kapolisan kaniadto ug nagsilbi sab nga kabahin sa kalihukan sa Dangerous Drugs Board pagmonitor sa kampanya sa kapolisan batok sa illegal nga drugas niadtong ang kanhi manager sa DYLA ug karon Secretary Cerge Remonde mao pay chairman sa DDB dinhi sa Central Visayas.

Sa ubay ubay nga mga operasyon sa Task Force Banat kaniadto diin si Ocampo nadistino isip team leader mahimo gani kining sumsuman sa kantiyaw sa iyang mga kaubang polis tungod kay kanunay kining magpa-awahi ug unya na mosulod sa panimalay nga ilang gironda kon luwas na ang panimalay nga sudlon.

Ako personal maglisod pagtoo nga si Ocampo gyud ang mamumuno ni de la Victoria tungod sa lahi nga matang sa pagkatawo nga akong nailhan niya. Apan sa pikas bahin lig-on ang pamahayag sa mga saksi nga nagtumbok niya nga maoy mipusil ni de la Victoria niadtong Miyerkules santo sa hapon didto sa pinuy-anan niini sa Ramona Village sa sitio Dawis, barangay San Roque dakbayan sa Talisay.

Mao nga kinahanglan sab niyang pamatud-an nga inosente siya sa pasangil batok niya. Pipila sa mga alibi ni Ocampo namatud-ang tinuod basi sa affidavit sa kaugalingong mga saksi sa kapolisan.

Pananglitan ang sulti ni Ocampo nga siya didto sa dakbayan sa Danao niadtong adlaw nga gipusil si de la Victoria tungod kay nagpaayo siya sa iyang armas. Labing minus tulo ka mga saksi gikan sa Danao ang mimatuod niini, apan ang problema ni Ocampo tungod kay alas 9:00 pa sa buntag siya katapusang nakit-an didto sa maong dapit.

Lain niyang sulti mao nga didto siya sa Cebu Provincial Police Office niadtong hapon sa Miyerkules santo kay nagkuha sa ilang combat pay ug kini andam sab nga pamatud-an sa pipila ka mga polis nga nakakita niya didto sa kampo. Apan laing problema ni Ocampo mao nga alas 2:15 sa hapon siya katapusang nakit-an didto.

Gikan sa alas 2:15 hangtud sa alas 3:00 sa hapon diin gipusil si de la Victoria maoy importanteng mga gutlo nga kinahanglang iprobar ni Ocampo kon diin siya niining mga higayona. Si Sr. Supt. Vicente Loot ang hepe sa kapolisan sa lalawigan sa Sugbo miingon nga sa iyang pag-imbistigar ni Ocampo nagkasumpaki ang pamahayag niini.

Sa sinugdan miingon si Ocampo nga didto siya sa Cebu Doctors Hospital nianang higayona tungod kay mibisita sa iyang higalang Belgian national, apan sa lain niyang pamahayag siya miingon nga didto ra siya sa ilang pinuy-anan sa luyong bahin sa Miller Hospital. Lain niyang alibi mao nga didto siya sa usa ka barber shop sa may N. Bacalso kay nagpatupi sa iyang buhok.

Kini maoy angayang husayon ni Ocampo sa iyang pamahayag tungod kay labihan ka importante sa maong mga higayon aron niya makombinsir ang publiko labi pa ang korte nga siya inosente sa kaso. Apan kon ikaw man gani ang responsabli mas makatabang siguro alang nimo aron mogaan gaan ang imong silot ang pagtug-an kon kinsay mastermind.

* * *

Sa pikas bahin, higala ug kauban sa buhat maoy akong pag-ila ni Jojo tungod sa kamaayong tawo niini. Pipila ka adlaw sa wa pa siya patya nagkauban mi sa usa ka operasyon sa NBI didto sa Caubian Island sa dakbayan sa Lapu-Lapu. Namatikdan na nako niadtong higayona nga daw sa minghoy ug hilomon siya niadtong higayona sukwahi sa naandan niyang personalidad nga usa ka jolly nga pagkatawo.

Ambot ug tungod balang sab kaha kadto kay nasaag mi sa among biyahe o sinyalis na gyud kadto nga dunay umaabot nga dautang hitabo sa iyang kinabuhi. Pero bisan og nahanaw si de la Victoria, apan wa makawang ang iyang kawsa nga gibilin alang nato ug sa umaabot pa nga henerasyon. Ang iyang kamatinud-anan sa iyang trabaho ug kawsa nga gibarugan angayang panaminan sa uban pa natong opisyal sa kagamhanan.

Bisan sa mga tentasyon sa kasilaw sa bahandi ug sa tinagingting sa salapi ug labi na sa hulga sa iyang kinabuhi padayong gibarugan ni de la Victoria ang iyang kawsa ug ang pagtuman sa iyang trabaho. Hinaot nga nagbilin si Jojo ug sumbanan ingon man inspirasyon sa ubang mga opisyal sa dakbayan sa Sugbo.

* * *

[email protected]