Duha mi ka adlaw nga nagka-uban ni dela Victoria aron sa paghatag ug aksyon sa problemang dili lang ang mireklamo ang makabenipisyo, apan ang gatosan ka mga tawo nga mobisita sa merkado. Wala koy laing nasulti ni Mr. Dela Victoria human sa among gamay nga proyekto gawas sa pasalamat.
Si dela Victoria ang usa ka tawo nga puno sa aksyon ug prinsipyo. Siya ang usa ka empleyado sa gobyerno nga gibuksan ang iyang kawsa sa publiko pinaagi sa media. Sama sa ubang mga lider sa gobyerno ug pribadong sektor, puno sa plano si dela Victoria. Apan ang nakalahi, kanunay nga may konkretong aksyon ug katumanan ang iyang mga plano. Makakugang ang kamatayon ni Jojo sama ra nga nakurat ang publiko sa dihang nasayud sa kadaghan sa iyang nahimo sulod sa iyang kuarenta y says ka tuig niining kalibutana.
Hangtud karon ana-a pa sa akong cellphone ang pipila ka mga mensahe ni dela Victoria kabahin sa Ginoo ug pag-atubang sa pagsuway sa kinabuhi niining kalibutana. Nahimong batasan ni dela Victoria ang pagpadala ug mga mensahe sa mga tawo nga nakatandog, nakatabang ug nahimong kauban niya sa kawsa sa kaayuhan. Wala koy planong papason ang maong mga mensahe tungod kay dako kini ug silbi sa pagpahinumdum nako sa unsa ka bililhon ang kinabuhi ug ang kahigayonan nga makaserbisyo sa ubang tawo nga walay gipa-abot nga bawos.
Saludo ko sa mga pulis sa ilang abtik nga aksyon sa pagsolbad sa pagpatay sa usa ka abtik nga alagad sa kagamhanan ug sa simbahan. Apan angayan nga isipon sa mga pulis nga ang suspetsado magpabiling suspetsado hangtud nga mapamatud-an sa korte. Ug ang suspetsado nga nasikop dili pa tubag sa pangutana kung kinsa ang utok sa krimen, unsa ang hinungdan nganong gipatay si Jojo ug unsa pa ang laing dautang plano sa grupo o tawo nga nagsugo sa pagpatay kang dela Victoria.
Usahay makapangutana ko nganong magmalampuson ang dautan batok sa maayo. Nganong malampusong napatumba si dela Victoria nga walay laing gihimo gawas sa pagtuman sa iyang kawsa ug pagpanalipod sa kadagatan. Siguro mao usab ni pangutana nga nagduwa sa huna-huna sa daghang mga tawo nga nakasinati ug nakahimamat og buotang tawo apan sa katapusan gipatay sa walay tinong hinungdan. Apan sa dili pa ko mo-kwesyon sa pagbuot sa kahigayonan, akong giisip nga ang kamatayon ni dela Victoria maoy pagpukaw sa daghang mga tawo nga nakatulog na sa ilang responsibilidad sa kadagatan, pagpahinumdum sa lokal nga kagamhanan sa tinu-uray nga estado sa kahapsay ug kalinaw sa dakbayan ug ang pagpakita sa matag usa nato sa klase sa moralidad nga naglibot sa sistema sa atong kalibutan karon.
Gikan sa pamilya, suod nga mga higala, mga empleyado sa gobyerno, sakop sa simbahan ug sa media, daghan ta ug napunit nga leksyon sa kinabuhi ni dela Victoria. Apan ang dakong pangutana karon alang nato, aduna pa bay tawo nga sama ka lig-on ang baruganan ug ka-isog ang prinsipyo ni Jojo dela Victoria. Dako ang akong pagtuo nga ang bisan unsang maayong kinabuhi nga kuha-on og balik sa kahitas-an, iyang ilisan og mas daghan pang maayong kinabuhi. Naghinamhinam ko nga akong mahimamat ang lain pa nga Jojo dela Victoria.