Hulga ni Jojo

Si Jojo de la Victoria maoy nagduma sa Dangpanan, usa ka tulumanon sa radyo nga nahimong kahimanan pag-atiman sa dinaliang mga panginahanglan sa katawhan gikan sa nagkalainlaing mga buhatan sa kagamhanan. Ang iyang mga tigpaminaw nakaamgo nga mahimong mas gamhanan ang ilang tingog kon maghugpong sila. Si de la Victoria nitabang nila pagparehistro sa Dangpanan isip foundation sa Securities and Exchange Commission.

Ang kakusog sa tulumanon nisangpot sa paspas nga paglapad sa kahugpongan. Nagkasuod mi pag-ayo ni Jojo kay akoy kasagaran niyang gikuha nga tigpanumpa sa mga opisyal sa Dangpanan di lang sa mga dakbayan ug kalungsoran sa Sugbo kon dili hasta na sa Bohol ug kasilinganang mga lalawigan. Siyay nakahatag nako og sukaranan sa pangandoy nga ang radyo makahatag og mas makahuloganong pangalagad, labaw sa naandang pagsibya sa mga reklamo pinaagi sa kahanginan.

* * *

Sa iyang pagduma sa Dangpanan ug sa uban niyang mga katungdanan, way makalalis sa iyang kakugihan pagpangunay pagsunod sa mga suliran nga gisang-at ngadto niya. Kaila niya ang tanang tagduma ug katultol siya sa ilang mga buhatan mao nga kasagaran sa mga nidangop niya natagbaw gyod sa iyang pag-atiman.

Maong dihang natudlo siya isip project director sa Cebu City Bantay Dagat Commission, masaligon kong molampos siya. Nabalaka hinuon ko nga ang pamolitika sa burukrasya mas grabeng hulga kay sa naagian niyang mga intriga sa pribadong sektor. Apan dihang gawas nga nakalahutay sa katungdanan gitudlo pa gyong market administrator, nagtoo kong gawas sa iyang kakugi nakat-on na sab siya pakiglambigit sa mga politiko ug sa nagkasungi nilang mga interes.

* * *

Nagduda ang kapolisan nga ang kamatayon ni Jojo nanukad sa iyang pagpaluyo sa kampanya pagtak-op sa Visayan marine triangle gikan sa commercial fishing. Kon tinuod man, ang mga utok sa iyang kamatayon nawad-an og kasaligang alyado. Kay tungod sa lapad niyang kasinatian sa kampanya batok sa ilegal nga pangisda, si Jojo nakakita sa talan-awon lapas sa tumoy sa iyang ilong.

Si Jojo nagpasidaan nga ang ban makapakub sa bugasan sa kaliboan ka mga mangingisda. Giawhag niya ang pangu sa kampanya, Atty. Antonio Oposa, ug ang lokal nga mga opisyal sa pagpatuman og alternatibong mga panginabuhi sa di pa mapugos ang mga mangingisda pagdangop sa ilegal nga mga paagi pagbuhi sa ilang mga pamilya.

* * *

Pila ka tuig ang nilabay, si Jojo gipasidan-an ni Cebu City Vice Mayor Michael Rama nga:

o Ang iyang pagpakita sa media sa pagsikop sa pinabuthang mga isda ug paghatag sa kontrabando ngadto sa BBRC ug ubang mga institusyon mahimong makapasamot sa kasuko sa ilegal nga mga negosyante; ug

o Ang kanunayng pag-atubang sa media mahimong makapasuko sa mga politiko. Nakasugakod si Jojo sa kasina sa mga politiko. Apan wa kaipsot sa ubang nayatakan sa pagtuman sa iyang katungdanan.

* * *

Email: [email protected]