Si Jojo

Ang pagkamatinud-anon sa trabaho maoy angayang mahayan sa sayo nga kamatayon ni Elpidio "Jojo" dela Victoria Jr.

Usa siya ka matuod nga alagad sa publiko.

Tigbantay sa kalikupan.

Bantay sa dagat.

Tiglimpyo sa gubot nga kamerkaduhan.

Dili na mobangon sa iyang lungon si Jojo, apan magpabilin sa atong galamhan ang iyang tinuod nga pagka-tawo nga dili mahadlok makigdam-ag sa kamatayon tungod ug alang lamang sa ngalan sa serbisyo.

Bisan nasayod siya nga daghan siyang hipangligsan, nagpadayon siya sa iyang kawsa ug gibarugan niya sa hingpit ang iyang trabaho ug walay kukahadlok nga mopatuman sa balaod.

Isip program director sa Cebu City Bantay Dagat Commission, dili hitupngan ang iyang performance. Pila ka toneladang isda nga kuha sa ilegal nga panagat ang nasakmit pinaagi sa market denial operation, diin daghang mga fish vendors sa Pasil ang nasuko kang Jojo.

Gawas niana, ubay-ubay'ng mga ilegal nga mananagat ang iyang napakonbikto sa korte.

Human makita sa mga opisyal sa kagamhanan sa siyudad ang iyang pagkamatinud-anon sa trabaho, gidunolan siya og pipila ka awards atol sa nangaging mga charter day.

Labaw nga premyo nga iyang nadawat mao ang pagkatudlo niyang acting market administrator. Apan, sa dihang nagkasulti kami ni Jojo makadaghang higayon, iya gyud nga ibalikbalik kanako nga gikuha na lamang niya ang posisyon pagka-market administrator tungod kay walay gustong modawat sa maong puwesto.

Bisan pa, nahimong bisi si Jojo sa Market Authority. Daghang tikasang timbangan ang gipangsakmit, daghang vendors ang gipamulta human gipangdakpi sa pagpanikas pinaagi sa kulang nga timbangan.

Daghang merkado ang gipanghawanan sa mga eskuwater ubos sa termino ni Jojo tungod sa hugot niyang pagpatuman sa Market Code nga nagdili sa mga residensiya sulod sa kamerkaduhan.

Mga utangan nga nag-abang og stall sa mga merkado napapahawa. Sa laktod, nalimpyuhan ang mga merkado.

Bisan bisi na kaayo si Jojo sa Market Authority, wala niya biyai ang iyang kawsa diha sa dagat. Nagpabilin siyang program director sa bantay dagat.

* * *

SINDIKATO. Kaniadto nga ang mga mananagat mismo ang iyang gipanggukod sa kadagatan, iyang gibalhin ang iyang stratehiya sa iyang programa pagprotehir sa kadagatan batok sa ilegal nga panagat.

Iyang gitarget ang mga negosyanteng nanggama ug nagpayuhot og mga kagamitan sa ilegal nga panagat sama sa dinamita. Ang resulta, mga gam-anan ug bodega sa blasting caps gipangronda.

Dili gyud ko malimot sa bodega nga gipanag-iya ni Pabling Santos sa Talisay nga gironda. Migawas gani kaniadto nga si Santos aduna diay mga padrino sa Cebu Provincial Police Office (CPPO) nga ubos pa kaniadto sa liderato ni Supt. Robelito Comilang. Human sa ronda sa bodega sa mga blasting caps ni Santos, narelibohan si Comilang.

Sukad niadto, wala nay puas ang mga death threats nga nadawat ni Jojo.

Bisan sa mga death threats, wala magbaton og bodyguard si Jojo. Iyang gihimong taming ang kanunay'ng pag-ampo. Nahimo siyang presidente sa pastoral council sa Parokya ni San Jose sa Tabunok.

* * *

VISAYAN SEA. Misamot ang mga hulga sa kinabuhi ni Jojo sa dihang nakig-alayon kaniya ang inilang Manila-based apan Cebuano nga environmentalist nga si Atty. Antonio Opposa sa kampanya pagpasira sa kadagatan sa Kabisay-an batok sa commercial fishing.

Nakadawat og suporta sa gagmay'ng mga mananagat ang kampanya nilang Opposa ug Jojo.

Nagbunga ang ilang kawsa, nasirad-an ang Visayan sea batok sa commercial fishing nga sa akong pagtuo maoy nakapa-aburido sa ulo sa mga dagkong panagatan nga naka-utang og minilyon aron ipadagan sa ilang negosyo.

Sukad natukod ang Visayan Sea Squadron, nakadawat na si Jojo ug Opposa og mga hulga sa kinabuhi.

Bisan pa niana, pabiling magtuhoy maglakaw si Jojo nga bisan gani korta o dagum nga ikadepensa sa iyang kaugalingon wala gyud siyay dala.

Kana tungod kay salig si Jojo sa iyang kaugalingon nga naghimo lamang siya kun unsay sakto ug unsay nalatid sa balaod.

Walay makatupong sa pagkamatinud-anon ni Jojo sa iyang trabaho ug kawsa sa kinabuhi.

Mao kanay tinuod nga Jojo.