Ang Pasil

Ang kinaham nakong panghambog ngadto sa akong mga higala, ug nahadlok kong nasuwat na ni nako dinhi sa makadaghang higayon, mao ang mga dapit nga akong gipuy-an sa pagsugod nakog trabaho sa radyo. Dihang gidawat ko sa DYLA niadtong 1984 isip campus reporter, nagpuyo ko uban sa akong mga igsoon sa boarding house nga gipanag-iya sa Pamilyang Orais sa eskina Lakandula ug C. Padilla.

Niadtong higayona, way makalabaw sa kalami ug kabarato sa akong mga pagkaon: Mamahaw kog init kaayong tinowa sa Taboan, maniudto og hang nga ulo sa kanding sa Panganiban ug manihapon sa lab-as nga sinugba sa Pasil. Ang amo ra gyod tingaling kakabos maoy nakapugong sa akong pagburot niadtong mga adlawa.

* * *

Dihang gilamian na ko sa akong trabaho sa radyo, nibalhin na kog puyo sa DYLA sa Pier Uno. Bisan sa kagamay sa among suholan, way nakapugong namo pag-piyesta kada gabii sa tanang tiil ug tinai sa manok nga ikahukad sa among pinalabi, kay mao ray magpautang, nga barbekyuhan.

Pagbalhin nakog trabaho sa DYRF, nibalhin sab kog puyo sa Pasil. Nga maoy nitanyag nako sa hangtod karon di malimtan nga unang hungit sa aslom apan makapahigam nga linarang ug, hinaot way taga DENR nga makabasa ini, ang lumoy ug puno sa duga nga karne sa pawikan.

Ang sunod nakong pinuy-anan, ang laing boarding house sa mga Orais sa Kamagayan, way ikapagarbo nga lamiang mga putahe. Apan maoy nakapabuka sa akong mga mata sa hubo nga hulagway sa gikaintapang red light district sa dakbayan sa pagpawong na sa kiat nga mga suga sa kagabhion.

* * *

Apan ang labing abunda nakong mga handumanan naumol sa kapin sa tuig nakong pagpuyo sa Pasil. Nangabang kog kuwarto sa bay sa akong mga higala-ang magtiayong Izon ug Winnie Veloso. Didto ko sa Pasil nakasuway sa akong labing unang sunog-naduktan gyong bungbong sa akong kuwarto-nga nagsige na lang kog saka kanaog sa hagdanan nga wa mahinultol unsay una nakong puston ug hakuton.

Didto sa Pasil ko gihangga nga maoy hinungdan nga wa kong kakuha sa akong finals sa una nakong tuig sa College of Law sa USC nga alang nako maoy labing klarong tilimad-on nga di alang nako ang abogasiya. Didto sa Pasil ko unang nakakita og bangis nga bugno sa magtiayon dinuyogan sa madasigong abiba sa mga silingan. Didto sa Pasil ko unang nakamay-ong sa tinuod nga dagway sa kakabos ug kaburong ug mabaw nga kalipay.

Nabalik ko sa Pasil gahapon. Nagkita mig balik si Izon ug ang karaan nakong mga silingan. Dagko nang kausaban sa among mga kinabuhi. Apan nagkauyon gihapon mi nga ang linarang, kinilaw nga bulinaw, sinugba nga mulmol ug way kinutobang panaghigala maoy labing bililhong mga bahandi ning walog sa mga luhaan.

* * *

Email: leo_lastimosa@abs-cbn.com