Globe: Lider sa wireless

Balik na usab kita human mawala og usa ka adlaw ning Tikdol sa Pordoy. Gitambungan nako ang tinuig nga panagtigum sa mga stockholders sa Globe Telecom niadtong Abril 4, 2006 sa Hotel Intercontenintal sa Makati City.

Atol sa maong panagtigum, nasayran nato nga sa pagtapos sa 2005, ang kinatibuk-ang kita sa Globe miabot na og P10.3 bilyones tungod sa pagpalapad sa network niini nga maserbisyohan ang 97 porsiyento nga populasyon sa nasud ug 93 sa kinatibuk-ang nasud.

Ang Globe adunay 5,159 ka cell sites lukop nasud sa pagtapos sa Disyembre sa miaging tuig. Mga 1,423 sa maong mga cell sites gitukod sa miagi lang tuig.

Sa 2005, ang Globe nagpabiling nag-una sa "postpaid" nga linya sa wireless samtang migukod usab ang Touch Mobile (TM), ang prepaid nga linya nga misikat sa masa. Ang TM adunay 83 porsiyento nga pagsaka sa gidaghanon sa mga subscribers, nga naabot og 3.1 milyones sa ika-upat nga kuwarter.

Ang hiniusang gidaghanon sa mga subscribers nagpabiling wala matandog sa 12.4 milyones.

Sumala pa sa report nga gipresentar atol sa tigum, ang positibo nga pagsagop sa mga subscribers sa nindot nga tanyag ug maayong presyo lakip na ang lapad nga network coverage maoy nakatabang sa tres porsiyento nga pagtaas sa wireless net service revenue sa Globe ngadto sa P48.5 milyones.

Sa kinatibuk-ang tuig sa 2005, ang hiniusang net service revenues misaka ngadto sa kuwatro porsiyento ngadto sa P54.9 bilyones.

Dili na malilong natong mga pordoy nga ang Globe mikab-ot na sa papel sa pagka-lider sa serbisyo sa wireless nga telepono.

* * *

REBELDE. Human sa stockholders meeting, gihimo ang press conference sa susamang hotel nga gitambungan sa mga tag-as nga opisyal sa Globe.

Nahisgutan ang padayong pagpangatake sa mga rebelding New People's Army (NPA) sa mga cell sites sa Globe sulod na sa lima ka tuig. Tiaw mo nang 50 na ka pagpangatake ang nahitabo sukad sa 2001 nga nagbilin og lainlaing gidak-on sa kadaot nga nahimo.

Wala hinuon mohatag og balor sa kadaot sa mga cell sites si Globe CEO Gil Genio, apan matud niini nga mokabat og P10 milyones ang balor sa matag usa ka cell site.

Si Atty. Rodolfo Salalima, ang Vice President for Corporate and Regulatory Affairs sa Globe Telecom, nagkanayon nga nakig-alayon na sila sa Armed Forces of the Philippines (AFP) ug sa Philippine National Police (PNP) aron mapakgang na ang mosunod pang pagpangatake sa mga cell sites.

* * *

CUSTOMS. Samtang didto kita sa kauluhan tungod sa imbitasyon sa Globe pagpa-cover sa ilang tinuig nga stockholders meeting, hilabihan diay'ng kagubot dinhi tungod sa bag-ong Customs Personnel Order No. 169 ni Customs Commissioner Napoleon Morales.

Ang maong CPO nagmando nga si Cebu Customs Collector Ma. Lourdes Mangaoang ibalhin sa Ilo-Ilo ug pulihan ni Gracia Zuño-Caringal.

Wala tumana ni Mangaoang ang CPO ni Morales (kinsa daling milarga sa China human niya kini pirmahi), inay gi-aplayan hinuon niya kini og temporary restraining order (TRO) nga gi-grant usab sa Court of Appeals. Ang basehan ni Mangaoang sa TRO mao ang wala pagpirma ni Finance Secretary Margarito Teves isip clearance sa CPO No. 169 ni Morales. Ubos sa Executive Order 133 ni Pres. Arroyo, kinahanglang may clearance ni Teves ang tanang reshuffling sa customs.

Nahilom na karon ang Mangaoang-Caringal stand off.

Tungod kini sa memorandum ni Teves nga i-hold in abeyance ang pagpatuman sa lahugay nga apektado ang duha ka kolektora sa adwana.

Miyentras tingale nahilom na ang isyu, maayong mohimo og lakang si Morales aron takduon ang mga dalan sa duha ka kolektora aron mapapas ang pagtuo sa publiko nga may gidapigan siya sa duha.

Si Morales maoy nailang amahan sa customs. Busa siyay adunay dakong kaakuhan paglikay sa iyang buro sa baga sa kasuko ug kayugot sa iyang mga sakop.

Ang Mangaoang-Caringal fight nakaapekto kaayo sa kinatibuk-ang buro.

Koleksiyon sa buhis sa mga imported nga kargamento ang labaw'ng apektado.

Mosamot pa kini kun dili hunongon kanang pagpangilog og puwesto.