Makig-phone pal o textmate

Moderno na gayod kaayo ang panahon karon. Kaniadto, ang labing yanong paagi sa pagpakig-communicate sa usa ka tawo nga atua sa halayo ipaagi sa sulat. Pero karon lahi na. Telepono ug cellphone na ang gamiton. Nunot niini, nauso usab ang pagpakighigala pinaagi sa telepono ug cellphone, kanang gitawag og phone pal ug textmate. Uso kini karon, partikular na sa mga batan-on.

Pero ang subo kaayong palandongon kay kining maong estilo gisuon usab sa mga badlongon sa katilingban karon. Ang magbabasa niining ubos tang lindog nga tag-iya sa cellphone number 0926-2526983 mitaho nga adunay mga mangingilad nga makigphone pal o makig-textmate una sa ilang prospective victim sa dili pa sila mopasalir sa ilang tinonto.

Sumala sa maong texter, ang mga mangingilad nga misagop niining maong estilo sa modus operandi maayong mobulatik. Sa kadugayan, kanang masuod na nila ang ilang biktimahonon, pangayoon na sa suspek ang account number ug PIN number niini. Ang rason: padad-an (kuno) og kuwarta ang biktimahonon. Tungod kay nindot ang maong oportunidad, dunay uban nga kuratan kaayog kuwarta nga mohatag dayon sa ilang PIN number ug account number sa bangko ngadto sa ilang phonepal o textmate, sa walay paghunahuna nga risgo kini alang sa ilang kaugalingon. Ulahi na silang makaamgo nga nabiktima sila sa tinonto.

"Akong friend nabiktima gyod niini," nagkanayon ang atong texter. "Nakuha ang P5,000 nga sulod sa iyang ATM kay gihatag man niyag apil ang PIN sa iyang ATM."

Usa kini sa angay bantayan sa atong kaigsuonan. Ang PIN dili angay mahibaw-an ni bisan kinsa aron dili makawat ang imong kuwarta sa lain. Personal identification number god kana nimo.

* * *

Sa laing bahin: "Naa miy problema sa among lugar mahitungod sa LPG. Mao ra gihapon ang presyo bisan nius-os na. Grabe ang pipila ka negosyante diri sa Aloguinsan ug Pinamungajan. Unta dili sila magpatuyang. Wala gyoy nag-monitor." -- 0926-4738786 (March 22, 2006--12:56:37)

(Sumbong ug reklamo? Text sa 0910-8105522)