Glo ug Thaksin

Si Primero Ministro Thaksin Shinawatra sa Thailand, sama ni Pres. Arroyo, gipasanginlang nagpahimus sa gahom pagpaburot sa mga interes sa iyang pamilya. Si Thaksin sama ni Arroyo nag-atubang og lapad nga protesta pagpalagpot niya sa katungdanan. Silang Thaksin ug Arroyo pulos nangugat nga wa kapamatud-i ang mga pasangil ug nangangkon nga nakapalambo sa ekonomiya sa ilang nasud.

Apan si Thaksin, lahi ni Arroyo, wa mopahamtang sa state of national emergency, wa mamunal ni manakop sa iyang mga kaatbang. Inay mopausab sa konstitusyon, si Thaksin nagpatawag og snap election nga iyang gidaog, bisan kon niboykot ang mayoriya sa mga botante sa ulohang Bangkok.

Human sa resignasyon ni Thaksin, unsay labing dakong kalainan sa duha ka lider? Si Thaksin dunay uwaw.

* * *

Mosugyot kong Mandaue City Mayor Teddy Ouano nga, samtang nagtuon pa unsaon pagtubag ang pagduda nga overpriced ang dagkong basurahan nga gipakatap sa kadalanan sa sama-sa-naandan-nauwahi-ug-kinopya-na-lang niyang kampanya sa garbage segregation, dugangan ang marka sa mga basurahan. Aron pagtino nga masabtan gyod sa mga Mandauehanon ang kampanya.

Igo na unta ang mga marka nga "Madunot" ug "Di Madunot" sa mga basurahan. Apan tungod sa kahinay sa pagpanghipos sa basura, angayng dugangan og "Makolekta" ug "Di Makolekta." Ug kay mas daghan mang di dayon makolekta, kon pasikaran ang masulub-ong rekord niya sa pagpanlimpiyo, ang mga di makolektang basurahan bahin sab sa labels nga "Masingo" ug "Di Masingo."

Sa di pa moulbo si Ouano sa kasuko sa puyra buyag tinarung nakong mga sugyot, angayng tubagon una niyang pangutana sa usa ka inosenteng Mandauehanon: "Unsa may pus sa among pagkugi pag-segregate nga ipunon ra man gihapong basura inigkarga sa trak?"

* * *

Tulo ka polis sa Mactan-Cebu International Airport Authority (MCIAA) nga gidudahang pulos hubog nanghasi sa pipila ka pasahero nga sayong nangadto sa tugpahanan alang sa ilang flight sa alas-5 sa kadlawon gahapon. Giabog nilang mga pasahero kay red alert kunong tibuok MCIAA. Dihang nipahibawo ang mga pasahero nga modangop sila sa general manager, ang mga polis, ambot wa pa ba lang katugpa o tua gyod kapusta sa Civil Service Commission nga nipalayas nang Heneral Adelberto Yap sa katungdanan, igo lang nangatawa.

Nagpalaban dayon mi sa pangu sa kapolisan, si Major Bonifacio Pusta, kinsa nipasabot nga maoy ilang lagda nga di pasudlan ang check-in area kon serado pang counters sa mga kompaniya sa ayroplano. Nisugyot siyang adto lang magpaabot ang mga pasahero sa lobby diin mga ang-ang ra sa hagdanan ang malingkoran. Si Koronel Sol Dalid sa Philippine Air Force nangutana: Nganong lisudlisuron mang mga pasahero? Unsa may kapuslanan sa dakong terminal fee kon di silang kagamit sa mga kahimanan?

Nipasalig na si Yap nga iyang panitan ang abusadong mga polis. Hinaot nga matuman sa di pa hingpit kahinginlan.

Email:leo_lastimosa@abs-cbn.com