Pharmacists sa customs

Ang kontrobersiya nga namugna sa kamanduan pagbalhin ni customs collector Lourdes Mangaoang gikan sa Sugbo paingon sa Iloilo miabli sa daghang ganghaan sa kamatuoran sa sistema sa atong gobyerno.

Ang labing tataw nga implikasyon sa maong kontrobersiya mao ang nagpadayong palakasan system diha sa atong gobyerno. Kon kinsa tong daghan ang koneksiyon sa taas maoy hatagan og pabor. Pananglitan, si Grace Karingal nga mao untay ihulip ni Mangaoang dinhi sa Sugbo, kinsa bay iyang gisaligan aron siyay magboot kon asa siya madistino bisan pa sa iyang kakuwang og qualification.

Sayon rang tultolon kon kinsay iyang gisaligan tungod kay siya igsuon ni Chief State Prosecutor Jovencito Zunio sa Department of Justice. Wa untay kwestiyon kon hitsas pas qualification si Karingal, apan ang nakadaot kay gawas nga wa siyay civil service illegibility wa gyud siyay bisan gamay nalang nga background sa customs.

Tiaw mo bay basi sa iyang resume nga giapud-apod sa iyang PR dinhi sa Sugbo nga pharmacist man diay nahuman niini. Unsa may gihimo sa usa ka pharmacist diha sa customs. Ang iyang bugtong qualification mao nga natudlo siya isip receptionist sa usa ka international meeting didto sa Tagaytay atol sa world Asycuda meeting.

Apan tungod kay lakas lagi ug hitsas sa koneksiyon hinungdan nga natudlo kini nga collector sa customs. Apan dugay nang milapas ang termino diin mahimo siya nga matudlo isip acting collector tungod kay wa gyud siyang kakuha og illegibility gikan sa Civil Service Commission.

Apan bisan pa niini, tungod kay lakas, nagpabilin sa customs og gusto pa nga moanhi sa Sugbo.

* * *

Way nahimo ang koneksiyon ni Karingal aron paghatud niya sa pwesto nga iyang gipangandoy tungod kay di sab papiri kon koneksiyon ang hisgutan si Mangaoang. Bisan tuod og mahulagway nga wa siyay gisaligan didto sa kaulohan, apan ang makabungog nga suporta nga iyang nakuha gikan sa mga negosyante ug sa lokal nga mga opisyal sa Sugbo usa ka butang nga nakatay-og sa mga padrino ni Karingal.

Ang pagtingog nilang Mayor Tomas Osmeña, kongresista Raul del Mar, Antonio Cuenco ug Nerissa Soon Ruiz ingon man sa mga negosyante agig depensa ni Mangaoang daw liti sa udtong tutok nga nakapakugang sa mga opisyal sa kaulohan hinungdan nga gisuspenso ang pagpatuman sa lahugay.

Klaro ang bulok sa politika sa maong kontrobersiya, nahadlok ang Malacañang pag-insister sa pagbalhin ni Mangaoang gikan sa Sugbo tungod kay dako'g utang kabubut-on si Presidente Arroyo sa mga opisyal sa Sugbo.

Kini maoy wa makit-i sa mga nagtuboy ni Karingal nga mahimong collector sa customs dinhi sa Sugbo. Karon nga wa molampus ang tinguha pagbalhin ni Mangaoang, seguradong markado na ang tanang mga negosyante nga klarong mihatag og pundo aron pagsiguro nga matangtang si Mangaoang.

* * *

[email protected]