Unsay giilogan?

Gubot ang mapaabot sa mga negosyante diha sa Bureau of Customs karong adlawa kon tinud-on ni collector Lourdes Mangaoang nga di mokanaog sa iyang pwesto bisan pa sa kamanduan nga giluwatan ni acting commissioner Napoleon Morales nga nagbalhin niya didto sa Iloilo.

Kon mahitabo nga mamugos pod og lingkod karong adlawa si collector Gracia Karingal agig sunod sa Customs Personnel Order 169-2006 nga gipirmahan ni Morales niadtong Beyernes seguradong magkaguliyang ang aduana.

Kinsa mang pirma ang toohan karon sa mga kawani diha sa port of Cebu kang Mangaoang o kang Karingal? Kon basihan ang nanglabay nga mga order gikan sa Manila duna kini'y pirma ni finance secretary Margarito Teves.

Ang executive order 133 nga gipirmahan ni Presidente Gloria Macapagal Arroyo niadtong Disyembre nagkanayon nga kinahanglan ang pagtugot sa secretary of finance ang bisan unsang lahugay sa mga district collector sa customs.

Apan ang CPO 169-2006 gikatahong way pirma ni Teves kini maoy hinungdan nga di mokanaog si Mangaoang sa iyang pwesto. Si Mangaoang ug ang iyang mga supporters mikwestiyon sa legalidad sa maong kamanduan tungod kay wa kini'y pirma ni Teves.

Kon tinuod nga way pagtugot ni Teves ang pagbalhin ni Morales kang Mangaoang gikan dinhi sa Sugbo, posibling manubag si Morales niini. Sukad pa sa sinugdan paglingkod ni Mangaoang dinhi sa Sugbo gitay-og na siya sa daghang mga pagsuway pagpalagpot kaniya sa pwesto.

Gani ang mga tinubdan sa Lintunganay nagbutyag nga duna pay mga iladong negosyante nga gidudahan sab nga nalambigit sa smuggling activity ang migasto sa kampanya aron siya mabalhin gikan sa Sugbo.

Kon tinuod ang kasayuran nga dunay migasto aron palagputon si Mangaoang sa Sugbo ayaw ko'g ingna nga lakip si Morales ilang nabayran? Di ba? Kay imposibli man nga magbuot buot si Morales og balhin ni Mangaoang kon way pagtugot ni Teves nga nasayod man siyang daan niini.

Aron pagtin-aw niining tanan, mas maayo sigurong si Teves mismo maoy mohatag sa katin-awan kon duna bay pagtugot niya ang pagbalhin ni Mangaoang. Hangtud nga dili ni matin-aw nabalaka ko nga magubot ang customs nga maoy hinungdan na hinuon sa pagsamot pagti-orok sa atong collection.

Dako gani ang posibilidad nga mahidangat sa korte ang maong isyu. Posibli nga moduso og petition for injunction si Mangaoang didto sa korte karong adlawa aron awhagon nga moluwat og temporary restraining order pagpugong sa paglingkod ni Karingal.

Ang TRO lang maoy bugtong makapugong ni Karingal paglingkod karong adlawa ug sa posibling kagubot ug kalibog diha sa customs. Way mahimo ang mga manifesto of support gikan sa mga lokal nga opisyal ug mga negosyante aron pagpugong niini.

Apan dako kining butang alang sa publiko pag-ila kon unsang klase ang atong collector sa customs. Ang suporta sa mga negosyante ug sa mga lokal nga opisyal ngadto ni Mangaoang nagpakita ni nga naayonan siya.

Wa pa mahitabo sukad masukad nga gipakita sa mga negosyante ug mga lokal nga opisyal ang ingon niini kainit nga suporta sa usa ka kolektor.

* * *

E-mail: [email protected]