Kuwaresma ron uy!

Usa kadto ka adlaw'ng Biyernes. Nagkakita mig pila ka amigo sulod sa usa ka kan-anan. Nagkaon na sila pagsulod namo. Sa akong kahibong, pulos karne ang ilang gikaon.

Ako silang gikomedyahan pag-ingon nga maayo pang mga Muslim nila kay mo-observed gyud strictly sa dili pagkaon og karne sa tibuok nilang kinabuhi.

Kita, nga ma-Biyernes da panahon sa Lent ang pag-abstain pagkaon og karne, di gyud ka-agwanta. Daku na kaayo ni nga sakripisyo ug kasakit og di ta kakaon og karne ining mga adlawa. Pastilan, kataphaw sa atong Pagtoo, Dro. Mao nay Catoliko?

Anyway, atong mohulagway nga medyo wa'a nay epekto alang sa daghan kanato ang pag-observe sa Lent. Gani, ang ato karong mga batan-on wa'a na kasabot kun unsay Lent.

Lahi sa unang mga panahon nga panahon na gani sa Kwaresma, atong makita ang mga kausaban sa panglihok sa tawo, subay sa mga kalihokan sa Simbahan.

In particular, for instance, mo-minus gyud ang halin sa karne, ug diyutay ra sad ang maninda niini. Sa mga kan-anan, sagad wa'ay karne ang orderon sa mga tawo. Apan, karon, mora na man lag wa'ay Lent.

Nagpasabot lamang kini nga ang tawo karon, sa atong kamoderno ug ka-advance konuhay, medyo wa'a na kaayo magkinahanglan sa Ginoo. Sa atong ka-bright ug sa pagka-maalamon, wa'a na ta magkinahanglan og Lent. Wa'a na kinahanglana ang paghinulsol ug pagpamalandong sa atong kahuyang ug kangil-ad.

Alang sa daghan kanato, usik-usik lang nis panahon ang Lent. Maoy hinungdan nga di na nato karon ma-felt ang kainit sa pag-observe sa Lent. Wa'a nay Semana Santa, wa'a nay Hueves ug Biyernes Santo. Ug tungod kay wa'ay Biyernes Santo, wa'a say Easter Sunday.

Pastilan pagka-isog sa tawo karon. Unsa bay atong gisaligan nga wa'a na man ta magkinahanglan sa Ginoo? Nagsalig ta sa kadaghan sa atong kuwarta? Nagsalig ta sa atong kagamhanan? Nagsalig ta sa kahimsog sa atong panglawas? Nagsalig ta sa atong ka-guwapo ug ka-guwapa?

Nakalimot ta nga kining tanan, lumalabay ra gyud. Nganong mao may atong seguroon ang mga butang nga mahanaw against sa eternity o sa mga butang nga molungtad?