Mga brgy opisyal ang hari-hari?

Ang mga opisyal sa barangay angay unta nga mahimong modelo ngadto sa mga molupyo sa lugar nga ilang ginsakpan. Katungdanan nila ang pag-atiman sa mga panginahanglan sa barangay ug sa ilang mga kakonstituwente. Kinahanglan nga mohimo silag lakang aron pagmintinar sa kahusay ug kalinaw sa ilang balwarte.

"Sir, naaghat ko sa pag-text sa Modus tungod sa kahiwi sa ug kangil-ad niining among barangay karon," nagkanayon ang usa ka texter nga nanag-iya sa cellphone number 0916-8579548.

* * *

Ang maong texter igo lang nagpakabana sa kahimtang sa ilang barangay. Kining maong barangay nahisakop sa lungsod sa Minglanilla. Ingon sa nahisagmuyo pag-ayo ang atong texter sa binuhatan sa mga opisyal sa maong barangay nga, kon tuohan nato ang iyang sumbong, mga abusado sila.

Sumala sa iyang giasoy pinaagi sa text, ang hari-hari sa ilang barangay mao ang mga oisyal. Wala kunoy nahimo ang kapitan sa salawayong binuhatan sa maong mga opisyal. Kun tuohan nato ang gisumbong sa maong texter, makaingon kita nga abusado sa ilang katungdanan ang maong mga opisyal.

* * *

Nganong dili man abusado nga matud pa sa atong texter, hubog-hubog ray nahimo niining maong mga opisyal. Unya kon mahubog na, manion dayon og armas. Gilaliman ka? Apil kuno ang konsehal niini, sumala sa atong texter.

Ang akong ikasulti mao nga okey ra man kun maghupot sila og armas basta lisensiyado ug may permit sila sa pagbaton niini. Pero kon wala silay kompletong mga papeles sa ilang armas, dako kanang kuwestiyonable.

Matud pa usab sa atong texter, kini kunong usa sa mga konsehal sa maong barangay lainlain lang og sakyanan. Hasta sa katulo mag-ilis og sakyanan sulod sa usa ka tuig. Para nako, okey ra gihapon kini kon iyang kaugalingong kuwarta ang gipalit sa maong mga sakyanan. Basin diay kon maka-afford gayod siya. Pero kon daotan ang gigikanan sa iyang kuwarta, dili kana maayo.

Akong klarohon nga wala pa ako motuo niining maong taho, apan sanglit may sumbong man nga gipadangat ngari kanako bahin niini, mas maayo nga mahimoan kinig pakisusi aron masuta kun unsa kini ka tinuod.

* * *

(Sumbong ug reklamo? Text sa 0910-8105522)