Apan nahugno ko pagkahibawo nga bodega ra diay ang gitukod sa mga boluntaryo sa Gawad Kalinga (GK). Dugay na silang andam pagsugod pagtukod sa gatosan ka kabalayan apan gidid-an sila sa munisipyo. Gawas sa GK, daghan pang ubang kahugpongan nga gustong mopalambo sa relocation site, apan nganong usa ka buwan ug usa ka semana na human sa katalagman, wa man mag-apura ang lokal nga mga opisyal?
• Una, way igong kuwarta ang munisipyo nga ikapalit sa silingang mga luna kay nagpahimus sang mga tag-iya pagpaburot sa presyo, gawas nga P3 milyones ray cash donation ang nadawat sa St. Bernard;
• Ikaduha, kinahanglang palapdan ang relocation site aron maapil ang kapin sa 500 ka pamilya gikan sa silingang mga barangay sa Guinsaugon, kinsa gilayoan ra sa laing relocation site nga gitanyag alang nila;
• Ikatulo, ang US marines motuman lang sa ilang saad pagtukod sa temporaryong mga bay sa mga bakwet kon titulado ang luna, ug dakong bahin sa 5.6 ektaryas wa pay titulo; ug
• Ikaupat, managlahi ang gidak-on sa mga bay nga tukuron sa GK ug Phil. National Red Cross (PNRC), maong gikahadlokang mag-ilogay ang mga molupyo.
Di imposibleng hapsayon ang nahisgutang mga babag. Bisan ipuno pang giingon ni Gobernador Rosette Lerias sa Southern Leyte nga pagtugot sa Mines and Geo-Sciences Bureau (MGB). Apan ambot nganong wa gyoy lider nga nibarug ug namugos sa labing makiangayong lakang-ang pagtukod na sa kabalayan sa mga bakwet sa labing daling panahon.
Kon imong sud-ungon ang kahimtang sa mga bakwet sa St. Bernard Central School, Cristo Rey Regional High School ug Catmon Elementary School, di gyod unta mangahas ang lokal nga mga opisyal sa paglangay-langay. Nagsinardinas lang gihapon ang hangtod 31 ka pamilya sa alimuot kaayong classroom, nanimaho ang ilang palibot ug nagtinakdanay na sa sakit ang ilang kabataan.
Bangis nang daan ang katalagman nga nihakop nila sa niaging buwan. Nganong kinahanglan pa man silang pahamtangan og laing katalagman sa pagpabaya una makatilaw sa hinabang nga gipabaha sa tibuok kalibotan alang nila?