Mag-rally mo?

Ang napulo ka tuig nga higayon aron bayran sa data-data nga paagi ang luna nga gitukoran sa inyong panimalay, tukma na kaayo nga panahon kon may tinguha pa gayod kamo nga angkonon sa hingpit ang maong yuta.

Kamong mga 4,000 kapin ka pamilya nga anaa magpuyo sa yuta sa probinsya nga ania mahimutang sa dakbayan, angay'ng momahay sa inyong tagsa-tagsa ka kaugalingon.

Angay'ng mahayon ninyo ang inyong kaugalingon kon ngano nga sulod sa daghang katuigan, nagpaalingog-lingog ra kamo og wala motuman sa awhag nga impason ang inyong bayranan sulod sa maong gidugayon.

Ang akong pangutana, nganong ang uban lagi nakabayad man? Pila ra man goy kantidad sa yuta nga inyong giukopar kon bahin-bahinon sa mga buwan sulod sa napulo ka tuig.

Kon ibutang nato nga ang kantidad sa yuta nga gitarokan sa inyong panimalay miabot og P120,000 - nagpasabot kini nga matag buwan unta sulod sa napulo ka tuig mobayad ra kamo og tag P1,000.

Ako sigurado nga kon nadayon pa ang land swapping tali sa dakbayan ug probinsya, ang City Hall mao na usa'y maproblema sa pagkolekta sa bayranan gikan niining maong mga pamilya.

Nakadungog ko nga karong hapon mag-rally kuno kamo atubangan sa City Hall atol sa sesyon? Tsk-tsk-tsk, mora'g wala mo'y angay nga mohimo sa maong lakang uy.

Sa akong bahin, kay wala man sab ko'y balay ug yuta, apan kon hatagan ko og higayon sama kaninyo, dili gayod nako sipyaton ang pagtigum og gamay aron nga matag tapos sa buwan, mabayran nako ang akong obligasyon.

Usbon nako, kamo ra usa'y sad-an ug angay'ng mabasol kon palagputon kamo sa Kapitolyo gikan sa inyong gipuy-an. Tan-aw hinoon nako pwerteng hasola ani nga buhaton.

Daghan na sa mga nagpuyo sa lote sa probinsya nga nakabayad na. Kadto sila dili na man gayod kadto mapapahawa gikan sa ilang gipuy-an.

Kon palayason ang ilang silingan nga wala makabayad sa yuta nga ilang gipuy-an, sa ato pa matabas-tabas ang yuta sa kapitolyo nga nagkatag-katag pa g'yod dinhi sa dakbayan.

Ambot og unsay sulbad sa ilang problema. Akong gisugyot sa mayor nga basin og mahimo ra nga ang maong mga pamilya adto ibalhin sa mga bakanteng yuta nga napalit kaniadto sa dakbayan.

Apan ang problema mao nga hangtud karon, kining maong yuta wala pa ma-develop sa dakbayan. Wala pay karsada, wala pay tubig ug wala pay koryente.

Sa laktud, gipuy-an pa ni's mga bitin. He! he! He! Dunay miingon nga bisan ang mga hayop dili pa mahimong mopuyo kay tungod lagi kay wala pa ma-develop, maligid ka tungod sa kabakilid.

Ang leksyon niini mao kini. Duna gani'y higayon nga ihatag kaninyo, mao na'y panag-ingnon "Grab the opportunity right away."

* * *

Nalimpyo-limpyo na og gamay ang aseras sa D. Jakosalem kagahapon, apan duna pa gihapoy mga gahi'g ulo. Tan-awon nato og karong adlawa, unsay labok nga himoon ni Major Vicente Mercado.

Usbon nako, midayeg ko sa mga tindahan nga giukopar sa Basilica United Vendors and Photographers Association nga gidumala ni Engr. Ernie Albaran kay walay kausaban, hapsay gihapon.

Kon duna may nagbinuang sa ilang sakop, pipila ra tingali. Ang grabeng nangabuso pinaagi sa pagbutang og baligya nga anaa na sa karsada mao ang sakop ni Haide "Basan" Amora.

Mga motorista nga mag-agian sa D. Jakosalem kagahapon nangalipay tungod sa gamay'ng kausaban. Apan ako gikuwangan pa gihapon.