Alang sa mga vendor

Mga suki, ang kaigsuonan natong mga vendor maoy usa sa labing paboritong biktimahon sa mga badlongon sa katilingban. Mao nga angay silang magbantay ilabi na gayod sa fake money nga gipakaylap karon sa mga badlongong sindikato.

Usa ka magbabasa niining ubos kong lindog mi-text kanako aron pagpadangat sa iyang concern alang sa mga vendor. Sa akong pagsabot, dako kaayo siyag pagpakabana sa mga vendor mao nga mipadangat siya sa iyang pahimangno ngadto kanila pinaagi niining akong kolum.

Partikular gayod nga gi-address sa atong texter ang iyang pahimangno ngadto sa mga vendor. Kalabot kini sa iyang nasayran nga modus operandi sa pagpakaylap sa mini nga salapi.

Usa mga estilo sa mga badlongon sa katilingban mao nga mopalit silag produkto sa tindahan nga ilang makursonadahan. Ang kantidad sa ilang paliton kapin sa P200.00. Ang kuwarta nga ilang ibayad bag-o nga P500.00 bill. Ang maong kuwarta dili fake o mini.

Samtang magkuha pa ang tindero o tindera sa sukli, mag-apura ang suspek kay nagdali kuno sila. kon sabton nila nga busy ang tindero o tindera, ilang kuhaon ang P500.00 bill nga ilang gibayad ug ilisan kini sa laing P500.00 bill nga fake. Sa ato pa, kuhaon nila ang P500.00 nga dili fake ug pulihan kini sa P500.00 nga mini nga salapi.

"Tungod lagi kay busy man ang manindahay, dili na lang susihon ang kuwarta," nagkanayon ang atong texter nga nanag-iya sa cellfone number 0906-8991827.

Ang akong ikasulti bahin niini mao nga dili gayod mokompiyansa. Makapaturok og katahap ang buhaton sa mga suspek. Ang pagbawi nila sa P500.00 bill nga maoy una nilang gibayad ug pulihan sa laing P500.00 bill makapaduda na. Unsa may ilang tuyo sa pagbawi sa maong kuwarta nga ang giilis niini mao ra man gihapon nga kantidad? Dili ba makapaduda man kini?

Mao nga ang angay buhaton sa mga vendor, dili gayod sila mokompiyansa. Magbantay gayod sila kanunay. Kon adunay tawo o mga tawo nga maghimog ingon niini nga transaksiyon sa ilang tindahan, kinahanglan nga ilang tinoon kon dili ba fake ang kuwarta nga gibayad sa ilang kustomer.

Karong panahona daghan kaayong mapahimuslanon sa higayon. Pero kon mag-amping lang kita, maibanan og diyotay ang posibilidad nga mabiktima kita sa tinontong buhat sa mga badlongon sa katilingban. Karong panahona, mas makabentaha gayod ang tawong segurista.

(Sumbong ug reklamo? Text sa 0910-8105522)