Pahalipay sa Boy Scouts

Ang Cebu Council sa Boy Scouts of the Philippines milusad adtong miaging adlaw sa kasaulogan sa ilang Diamond Jubilee karong tuiga. Daghang kalihukan ang giandam nang ipahigayon atol sa maong okasyon.

Usa sa labing dakong kalihukan mao ang Diamond Jubilee Jamborette nga himoon sa sityo Looc, lungsod sa Malabuyoc ning umaabot nga Disyembre. Mga 4,000 ka mga boy scout ang gipaabot nga moapil sa maong jamborette.

Ning tungora buot nato pahalipayan ang BSP Cebu Council ug ang mga kadagkoan niini atol sa ilang pagpangandam sa kasaulogan sa ilang Diamond Jubilee kun ika-60 katuig nga kasumaran.

Ang BSP Cebu Council nakatabang gayud og dako sa pag-umol sa atong kabatan-unan ngadto sa maayo ug mapuslanon nga lungsoranon.

Manghinaut kita nga magmalampuson ang umaabot nga kasaulogan sa Diamond Jubilee sa Cebu Council sa Boy Scouts of the Philippines ning tuiga.