Produkto sa absent minded lawmaking

Hilabihan ka init sa lantugi kon angayan bang ikondinar ang piskaliya sa Lapu-Lapu tungod sa pagpasaka lang og minus nga kaso batok sa upat ka mga gidudahang kidnappers nga nadakpan didto sa airport sa Mactan.

Kasagaran nanaway gyud ni piskal Geronima Baring ug ni piskal Evangeline Gicale tungod kay usurpation of authority lang ang ilang kaso nga gisang-at batok sa upat inay illegal possession of firearms tungod sa daghang mga high-powered firearms nga nasakmit gikan kanila.

Angkunon ko nga lakip ako guilty sa daling paghukom sa mga piskal nga wa pa masusi ang balaod nga ilang gibasihan sa resolution nga nagbasura sa illegal possession of firearms nga kaso. Apan di pa awahi ang tanan aron kurihian ko ang maong sayop.

Ang pagbarog nila ni piskal Baring ug Gicale sa ilang resolution bisan pa sa grabing pagsaway sa publiko sa ilang gihimo maoy nakaaghat nako pagsusi sa balaod nga ilang gibasihan sa ilang resolution ug sa ruling sa Korte Suprema.

Gibasihan sa Lapu-Lapu prosecutor's office pagbasura sa kasong illegal possession of firearams batok sa upat ka mga gidudahang kidnappers mao ang R.A.8294 nga nag-amendar sa P.D. 1866 kon illegal possession of firearms.

Ang Section 1 sa maong balaod tinuod naglatid nga di mahimong ipasaka ang kasong illegal possession of firearms batok sa usa ka akusado kon siya nakahimo og laing krimen. Di lang kay usa kon di daghan na nga mga ruling ang Korte Suprema kalabot niini.

Ang labing awahi mao ang kaso ni Vicente Agote batok ni Judge Manuel Lorenzo sa RTC branch 43 didto sa Manila, diin siya gikonbikto sa kasong illegal possession of firearms ug sa paglapas sa comelec gun ban. Apan ang labaw'ng hukmanan nagkanayon nga sayop ang huwis sa iyang pagkonbikto sa akusado sa duha ka kaso.

Ang desisyon sa RTC gi -modify sa Korte Suprema diin gibasura ang illegal possession samtang ang comelec gun ban lang nga conviction maoy gi affirm. Ang argumento sa huwis sa iyang desisyon mao nga dili maaply ang Section 1 sa R.A. 8294 tungod kay wa kuno gamita ang armas paghimo sa krimin.

Buot niyang ipasabot nga magamit lang ang Section 1 sa R.A. 8294 kon ang akusado nakahimo og krimin sama sa homicide, murder, robbery ug uban pa nga susama sa maong kaso. Apan matud sa En Banc decision sa Korte Suprema niadtong Hulyo 22, 2005 nga wa ni i-define sa balaod.

Ubos sa prinsipyo nga kon wa ilakip sa balaod isipon sab nga way labot, matud sa Korte Suprema nga ang maong proviso magamit sa tanang sitwasyon.

Sa Cupcupin Versus People gisustinihan sab sa Korte Suprema di gyud mapasaka ang illegal possession of firearm bisan ug ang armas nakuha tupad lang sa gidiling drugas. Laing jurisprudence nga nakakombinsir nako nga way sayop sila si Gicale ug Baring mao ang ruling sa labaw'ng hukmanan sa People Versus Almeida diin wa gihapon ilakip ang illegal possession of firearm tungod kay nakuhaan og drugas ang akusado.

Sa ato pa, sayop diay ang atong pagsaway sa piskal sa Lapu-Lapu sa ilang gihimo tungod kay duna silay igong gipasikaran sa ilang hukom. Tinuod nga kon atong basihan ang logic wa gyud masubay nga ang mas dako nga kaso maoy ibaliwala samtang ang gamay mao na hinooy gipasaka.

Lisod tinuod hunahunaon apan way mahimo ang piskal kay igo lang ning nagsunod sa balaod. Ang sayop ug ang angayang basolon niining tanan mao ang kongreso nganong gipasar ang maong balaod. Ang R.A.8294 nga gipangamahanan ni kanhi Senador Ramon Revilla Sr., diin kitang tanan sayod nga napanday aron pagluwas sa aktor nga si Robin Padilla, maoy klarong produkto sa gitawag og "absent minded lawmaking."

* * *

Akong mainitong pag-abi-abi sa bag-ong maglilindog sa Banat News nga sukad karon ug sa mosunod pang mga Biyernes atong ikauban. Welcome sa akong higala nga si Piskal Jane Petralba. Among mainiton nga paghangop sa imong pag-uban kanamo isip bag-ong sakop sa pamilya.

[email protected]