Bisan dili ko ganahan sa wali

Alang sa mga Katoliko, ang Santos nga Misa, giisip nga the best form of prayer. Mao sad ni ang akong gituhoan. Otherwise, dugay nakong nangita og laing tinuhoan nga waay Misa-misa.

Ug alang nako, incidental lang ang mga wali sa pari, kon unsa man ang ilang mga isulti tapus sa pagbasa sa ebanghelyo, waa ni labut sa akong pagsimba ug sa akong pagka-Katoliko.

Mahimo nga di ko makauyon sa ilang mga opinion, apan, alang nako, ila sad na. Imposibli nga sa tanang higayon magkauyon ug magkatakdo ang mga hunahunag opinion sa mga pari ug sa tanang parokyano.

Hinuon, samtang magkasukwahi ang atong mga hunahuna, waa sad ni magpasabot nga kita ang husto ug sayop ang pari.

Whatever, masayop man ang pari, di gyud mahitabo nga iangin nako ang Ginoo, ug biyaan nako Siya panahon sa Misa. Kon ang mga abogado ni-walk out sa impeachment ni Erap, atubangan nila ni Chief Justice Jun Davide ug Senate President Nene Pimentel, tungod lang sa sobre, di gyud ko ka-ako nga mao kini ang akong buhaton, tungod lang kay waa ko kauyon sa wali sa pari.

Ug labaw pang di ko kaako pagpangasaba sa pari panahon sa Misa. Sama sa nangaging mga panahon, diin daghan kaayong mga pari ug mga Obispo nga sa ilang mga homily, open kaayo ang ilang pagdaot ni Marcos ug ni Erap. Apan, waay bisan usa ka diehard nga lumalaban ni Marcos ug Erap sa tibuok nasud, ang mi-walk out sa Misa.

Sa ako nang giingon, incidental ang mga wali sa pari, ug kon magkasumpaki man ang among mga hunahuna, di nako iangin ang Santos nga Misa. Aw, yuna pa, waa bay labut ang Ginoo sa pagpamakak, pagpanikas ug pagpangawat sa tawo?