Milagro! Kumbati

Nagsugwak ang mga tawo nga midagsa sa Barangay Liki, lungsod sa Sogod amihanang Sugbo su'd na sa kapin duha ka semana. Ang ilang tinguha? Ang pagtan-aw sa giingong nawong sa Birhen Maria o Inmaculada Concepcion nga nilakra sa usa ka dakong bungtod. Mga bus, motorsiklo, awto ug mga tawo nga naglakaw, nagdasok sa lugar aron sa pagtan-aw sa matud pa, dakong milagro. Human sa pila ka adlaw nga pagbalik-balik sa lugar, adunay uban nga palarang nakakita sa imahe sa birhen, ang uban daw sa wa'y swerte tungod kay su'd sa pila ka adlaw nilang pagtutok sa bungtod, wa molutaw ang imahe sa birhen.

May mga tawo nga nagda' g buwak ug nagdagkot og kandila sa tiilang bahin sa bungtod. Inubanan sa pag-ampo, nagtu-o silang may importanteng mensahe ang mahal nga birhen kanila ug sa tanang mga tawo. Bisan sa kainit ug ka delikado sa dapit tungod kay daplin lang sa dalan ug pang-pang, walay nakapugong sa pagdagsa sa mga tawo. Ang matag usa may nagkadaiyang tinguha-pagpangindahay sa grasya, pagpangayo'g pasaylo ug pagtagbaw sa ilang pagka-kuruso.

Ang mga molupyo sa Talisay City ug isla sa Olanggo, milagro sab ang gipangayo nga di mahinayon ang huhungihong nga dakong bawod o 'tsunami' nga mo-abot sa ilang dapit. Giingong adunay tiguwang nga nagpakita sa dakbayan sa Talisay nga nangayo og tubig apan wala mahatagi sa igong pagtagad. Tungod ini, matod pa, nipahibawo ni nga may dakong lunop nga mahitabo. Gidasunan sab ang maong pahayag sa matud pa, usa ka bata. Susamang balita sab ang mikatap sa mga taga Olanggo. Ambot og asa ug kinsa ang nagsugod sa maong way basehanan nga balita. Siguro, milagro na lang kung masakpan o mailhan pa ang tawo nga nagsugod sa balita.

Adunay usa ka amahan nga may lima ka mga gagmay'ng anak ug asawa nga walay trababo. Luyo sa iyang kita isip konduktor sa dyip, milagro na lang kung matuman ang iyang ambisyon nga makapahuman sa pagtu-on sa iyang mga anak ug may negosyong kakuhaan ug kita ang iyang asawa. May usa ka pamilya nga hangtod karon, padayong nakigbisog aron makab-ot ang hustisya alang sa ilang anak nga babaye nga gitabangan og lugos. Milagro na kung makab-ot pa ang hustisya alang sa ilang anak. May usa ka barangay nga nangayo'g hustisya sa pagkamatay sa baynte siete ka mga bata nga maoy bag-o unta nilang henerasyon, milagro na lang ang mag-igo kung makab-ot ba nila ang singgit nilang hustisya. May gatosan ka mga tawo nga nabutang sa wa'y kasiguruhan ang ilang pagpuyo ug kaugma-on human matabuni ang ilang tibu-ok barangay sa midahiling yuta. Milagro sab ang ilang gipangayo nga makabarog sila human sa trahedya.

Milagro ang tana-aw sa kinabuhi sa mga tawo sa kalisud sa kinabuhi karon. Dili nako matinga kung nganong may mga tawo nga magsalig, magpa-abot ug magdahom kanunay og milagro kung mismo ang gobyerno nga ilang gisaligan, nagkinahanglan usab og milagro. Milagro na lang kung magka-ayo pa ang taga oposisyon ug ang administrasyong Arroyo. Milagro na lang kung mahatagan pa'g linaw ang isyu sa 'Hello Garci', milagro nalang kung mahatagan pa'g kasolbaran ang kasungi-an tali sa gobyerno ug sa mga rebeldeng NPA ug Abu Sayyaf.

Dili nako mabasol ang mga tawo sa Talisay City, Olanggo, Surigao ug ubang parte sa Luzon nga nagkinahanglan ug milagro aron mahupay ang ilang mga kabalaka sa matod pa, trahedya nga naghulgang mo-abot sa ilaha.

Dili nako mabasol ang mga tawo nga midagsa sa Sogod aron sa pagtan-aw sa giingong milagro sa Birhen Maria tungod kay buot nilang mahatagan ug katagbawan ang ilang pagtu-o, kasolbaran sa ilang problema ug direktang mapaabot ang ilang mga pag-antos ug pagsuway ngadto sa Ginoo.

Dili nako mabasol ang mga tawo nga sa adlaw-adlaw nangayo og milagro sa ilang kinabuhi ug pagpuyo ug kung ang katilingban nga ilang gipuy-an, labaw pang nagkinahanglan ug milagro aron hingpit nga mahibalik sa ka-uswagan, kalinaw ug kaugmaran.

Milagro na la'y mag-igo!