Nagtudtud ang piskaliya ug ang kapolisan kon kinsay angayang basolon nganong nakabuhi ang upat human makabayad og tag-dyes mil ka pisos nga piyansa tungod sa mubo lang nga kaso nga gipasaka sa Lapu-Lapu City prosecutor's office batok nila.
Inay illegal possession of firearms ang kasong isang-at usurpation of authority lang ang gipasaka ni piskal Evangeline Gicale batok sa upat. Ang rason kay kuno di mahimong ipasaka ang illegal possession of firearms kon dunay laing kaso nga nahimo ang mga sinumbong.
Tinuod bitaw dunay lagda niini, apan angayan tingaling magtoon og balik si Gicale sa balaod ug tan-awon og maayo kon husto ba ang iyang pagsabot sa R.A. 8294. Ang giingon sa balaod mao nga di mahimo nga ipasaka ang illegal possession of firearms kon ang mga akusado migamit sa armas paghimo og laing krimen.
Di ko abogado, apan simple ang ipasabot sa maong balaud, ang usa sa mga klarong ihemplo niini mao ang pagpanulis nga migamit og armas. Apan ang pangutana gigamit ba sa upat ang ilang armas sa paghimo og kasong usurpation of authority? Wa man tingali!
Wa man nila gamita ang ilang armas pagpani-on og mga tawo samtang sila nagpaila nga tinugyanan sila sa militar ug kapolisan, aron ta mohimo og conclusion nga di nato mahimong ipasaka ang kasong illegal possession of firearms kay nakahimo sila og laing krimin ginamit ang ilang mga armas.
Apan bisan pa sa klarong palpak ni Gicale, giduphan gihapon ni regional state prosecutor Antonio Arellano. Matud ni Arellano nga wa siyay nakitang sayop sa gihimo ni Gicale. Hinuon iyang gibasol ang polis kay mao kunoy mipasaka sa kaso.
Pastilan, wa ba diay masayod si Arellano nga duha ka buwag nga kaso ang gipasaka sa kapolisan, ang usurpation ug illegal possession nga alang nako husto ang ilang gihimo. Kon di man lang ganahan si Gicale nga duha ka kaso ang mapasaka kadto nalang untang illegal possession maoy gibilin kay mas dako ug bug-at itandi sa usurpation.
Mipagarpar pa si Arellano nga kinahanglan kuno og dugang training ang kapolisan ug mitanyag nga andam sila nga motudlo sa kapolisan. Pastilan, ayaw nalang RSP Arellano kon mao nay imong baruganan sa maong kontrobersiya kay lakip ako nagduda og makamao ba pod ka mosabot sa balaod o imo lang gyung giduphan si Gicale bisan nasayod kang sayop ang iyang gihimo.
Kon kamo maoy motudlo unya pulos sayop ang inyong itudlo, ayaw nalang kay sa akong tan-aw mas makamao pa ang polis kon unsay angayang kaso nga ipasaka kay sa ubang piskal.
Ang sayop lang sa polis niining maong kaso mao ang ilang kadanghag ug ambot wa ba sab gyud kaha sila masayod kon unsay angayang buhaton kon dunay dinakpan.
Sa akong naobserbahan sa ubang unit sa mga law enforcers sama sa National Bureau of Investigation, standard operating procedure kon SOP man unta na ang paghimo og record check sa mga tawong nadakpan.
Ang record check gitumong ni aron pagsuta kon wa bay pending kaso o warrant of arrest ang dinakpan. Apan klarong palpak ang kapolisan sa airport ug ang MIG nga maoy nakadakop sa upat paghimo niini.
Kon ila pa unta to nga gisusi ang record sa upat ila untang masayran nga duna diay silay pending nga mga warrants sa kasong kidnapping.
Ka dakong sagpa sa kapolisan nga ang anti-crime crusader na nga si Teresita Ang-See maoy mihatag nila og impormasyon nga ang upat miyembro sa waray-waray KFR gang. Hain naman diay ang intelligence sa atong kapolisan?