Mag-sideline og drive

Niining bahina sa akong lindog, tugoting hatagan nakog luna kining reklamo batok sa usa ka polis. Nakahukom ko nga hatagan kinig pagtagad tungod kay para nako, bakikaw kaayong hunahunaon ang gihimo sa maong polis.

Ang text nga akong nadawat nagkanayon: "Good day. I'm an avid reader of your column Modus in Banat News. Naa lang koy reklamo. Naay usa ka polis nga nag-sideline og drive og taxi. Apan ang nakabati kay on duty pa siya kon mag-drive kay nag-uniform man. Magabii ni siya mag-drive. Kolorum pa gyod ang taxi. Sa Queensland motel ni siya maghulat og pasahero. -- 0920-6655563

Sa kalisod sa panahon karon, atong nasabtan nga ang matag usa nagkinahanglan og extra nga raket gawas sa madawat nga regular nga suweldo. Halos man god dili na makasustenir ang suweldo alang sa inadlaw nga panginahanglan. Mao nga kinahanglan gayod nga mag-sideline iyawat na lang.

Pero niining gisumbong sa atong texter, morag tulibagbag kaayo kining pamation. Ingon sa eskandaloso kaayong tan-awon nga ang usa ka polis mag-sideline pag-drive og taxi sa panahon nga siya on duty. Pastilan, mauwaw kita sa mga magbubuhis niana.

* * *

Sa laing bahin: "Grabe kaayo makapataas og plite ang tag-iya sa lansa diha sa Tangil, Dumanjug. Puwerte man makapahimulos! Salig lang sila ray nagbiyahe nganha. Sayonan ka, nagplite na og tag P120 (upper) ug P110 (lower). Kon magbagulbol ang mga pasahero, ingon dayon sila: 'tungod sa E-VAT.' Pero bisan pag mabarato ang krudo di gihapon mopaus-os sa ilang plitehan." -- 0919-4988161 (Sent: Jan. 5, 2006--10:41:18)

Tinuod bitaw nga tungod sa E-VAT, misaka ang tanan karon, bili sa palaliton ug plitehan sa transportasyon. Pero dili gihapon maayo ang overcharging tungod kay nagsalig nga walay laing kapilian ang mga pasahero kay walay kakompetensiya. Hinuon, sa kaso nga imong gisang-at, ako makaingon nga mas maayong masusi kon tinuod ba nga adunay overcharging nga nahitabo. Dili una nato hukman ang tag-iya sa lansa samtang dili pa mamatud-an ang tanan.

(Sumbong ug reklamo? Text sa 0910-8105522)