Refundable kuno

Karong panahona sanglit moderno na man lagi kaayo, makahimo na kita sa pagpangaplay og trabaho pinaagi sa computer. Ipaagi na lang sa e-mail ang atong aplikasyon ug tubagon usab kita pinaagi sa e-mail. Uso na kini karon ug daghan na ang naghimo niini.

Pero maayong masayran sa atong kaigsuonan nga dili sa tanang higayon nga safe ang paghimo sa ingon. Kini tungod kay may mga badlongon sa katilingban na nga misuon niining maong sistema alang sa daotan nilang modus operandi. Mao kini ang bantayanan karon pag-ayo.

Usa ka magbabasa niining lindog nga nanag-iya sa cellphone number 0926-9034778 mitug-an kanako bahin sa iyang kasinatian sa e-mail. Segun sa iyang giasoy kanako, nakabasa siya og job hiring sa usa ka pamantalaan apan walay ngalan sa kompaniya. Bisan pa man, misulay gayod siya pag-apply.

Nakadawat siyag e-mail agig tubag sa iyang aplikasyon gikan sa usa ka kompaniya nga atua magbase sa gawas sa nasod. Gidawat ang iyang aplikasyon pero nagduhaduha siya sa pagsanong. Nangayo man god ang maong kompaniya kaniya og P1,500.00. Refundable hinuon kuno ang maong kantidad.

Ang akong ikasulti mahitungod niini mao nga angayan unta nga gipasabot sa maong kompaniya kon unsay gamitan sa P1,500.00 nga ilang gipangayo aron dili magduda ang ilang mga aplikante. Dili sab kita makabasol sa mga aplikante kon magduda bahin niini tungod kay kinsay dili mahibulong nga ang kompaniya nga giaplayan mao na man hinuon ang mangayo og kuwarta?

Sa pagkakaron, tun-an ko pa kining bahina. Dili una ko motumbok nga pangilad gayod kini. Apan aron safe kamo, mas maayo nga dili kamo mopatol gilayon sa higayon nga makadawat kamog e-mail nga ingon niini. Lisod na lagi kaayo karong panahona. Daghan nang klase sa tinonto.

Alang sa atong texter, nasayod ko nga nagkinahanglan ka og trabaho. Pero dili man sab tingali kinahanglang morisgo ka sa ingon niining sitwasyon nga walay klaro. Hinuon, basin tuod kon tinuod nga refundable ang P1,500.00 nga imong ihatag. Pero unsa man kahay garantiya nga mahibalik kanimo ang maong kantidad?

Dili kita mohatag og kantidad ilabi na kon walay pirmahan nga kasabotan tali sa naghatag ug sa gihatagan. Busa kinahanglan nga gamiton gayod nato kanunay ang atong utok aron kita makaagpas niining mga lansis sa panahon karon.

(Sumbong ug reklamo? Text sa 0910-8105522)