Paso na sab

Human sa makuting pakisusi, nga naabtan og pila ka semana human nato ibisto dinhi sa atong lindog ang makauuwawng anomaliya nga nalutsan ang Civil Service Commission (CSC) sa inusab nga kopya sa Republic Act 6958, ang charter sa Mactan Cebu International Airport Authority (MCIAA), napamatud-an na gyod sa CSC nga:

• Ilegal ang paghupot ni Heneral Adelberto Yap sa katungdanan pagka general manager sa MCIAA;

• Way katungod si Yap pagpabilin sa katungdanan lapas sa Pebrero 21 karong tuiga ni sa pagkobra sa bisan unsang suholan ug benepisyo gikan sa MCIAA; ug

• Kon mamugos ang MCIAA Board pagpalingkod ni Yap, silang Gobernador Gwen Garcia ug ubang mga sakop maduhig sa ilegal nga buhat ni Yap ug maoy pabayron sa bisan unsang pondo nga mabayad ngadtong Yap.

* * *

Sa laktod ug way lipudlipod nga pagkasulti, kolorum si Yap. Ang iyang pangugat nga siyay angayng molingkod bisan kon way qualification nga gihuptan sa karibal niyang mga aplikante, kay siya ray dunay nominasyon gikan ni Pres. Arroyo, nga iyang gipatoong maoy gimbut-an sa RA 6958, nasakpan nga dakong bakak. Ang kuwestiyonableng probisyon nga maoy gidigahan ni Yap sa tanan niyang baraha igo ra diayng gipasukip ug di gyod kabahin sa balaod.

Gani, ang pagkatangtang sa katungdanan di maoy kataposan sa kalbaryo ni Yap. Nagpadayon na karon ang imbestigasyon sa CSC kinsay nag-ilad nila. Aron pagmatuod sa ilang pangisog nga di na tugotang mailad pa sa umaabot, pasakaan gyod og kasong "falsification of public documents" ang nagbuotbuot pag-usab sa kopya sa balaod nga gisumiter ngadto sa CSC ni Transportation Secretary Leandro Mendoza, kinsa kon di kakonsabo sa nangalisbong lipatlipat gitoohan nga igo lang gilawogan ni Yap sa mini nga balaod.

* * *

Ang pag-uyon sa tanang sakop sa MCIAA board, way bisan usang nisupak, sa paglugway sa appointment ni Yap wa pa masumiter ngadto sa CSC, nga ubos sa balaod kinahanglang ilang himoon sud sa 30 ka adlaw. Kon isumiter na, ibasura kini sa CSC ug pahibaw-on ang board nga kalapasan sa balaod ang ilang pagsabak-sabak ni Yap ug nga kinahanglan silang mamili sa ubang qualified nga mga aplikante.

Sa ato pa, masikwate na sang MCIAA board. Ambot nganong wa pa gyod motagam human napaso sa samang eskandalo sa ilang pagdupadupa ni kanhi MCIAA general manager Angel Verdan kaniadto. Lisod sabton nganong sa makausa pa nagpabaga na sab pagyatak sa charter sa MCIAA.

Gusto ba lang gyod silang mosipsip ni Pres. Arroyo nga maoy nagpirma sa nominasyon ni Yap? O tinuod ang pasangil nga kabahin na sa higanteng konsabo pagpalusot sa multi-milyones pesos nga proyekto sa MCIAA nga mahimong lakturon lang pagpatuman ginamit ang umaabot nga ASEAN Summit isip salimbong?

* * *

E-mail: [email protected]