Apan akong klarohon nga bisan og nagtukod sila og grupo nagpabilin silang sakop sa IBP ug wa sila manawagan sa pagluwat ni Atty. Alex Tolentino sa katungdanan. Matud sa grupo sa mga abogado nga wa mahiuyon sa pag-apil apil sa ilang mga opisyal sa kalihukang politikal nga wa mangonsulta kanila nga ang ilang pagtukod og bag-ong grupo aron kini magsilbing "conscience block" sa IBP.
Basi sa ilang gipirmahan nga Articles of Incorporation ug ingon man Constitution and By-Laws, ang ilang grupo nga gitawag og Cebu Lawyers for Unity and Brotherhood gitukod kini aron pagsuporta sa IBP. Ang maong bag-ong natukod nga kahugpongan mitumbok nga ang pag-apil apil sa ilang mga opisyal sa mga isyong politikal nakalapas ni sa kaugalingong lagda sa IBP.
Ang Section 4 Article I sa IBP Constitution and By-Laws hugtanong nagdili kanila nga mosalmot sa mga kalihukang politikal. Sa ato pa, samtang sila si manlalaban Kit Enriquez, Democrito Barcenas, Alex Tolentino ug uban pang mga opisyal sa IBP namasangil ni Presidente Gloria Macapagal Arroyo nga milapas sa batakang balaud sa nasud pinaagi sa pagdeklarar og state of national emergency sila mismo milapas sa ilang kaugalingong constitution and by-laws.
Unsa may katungod sa mga opisyal sa IBP nga motulisok sa presidente nga sayop siya sa iyang gihimo nga sila utro man pod nga miyatak sa ilang kaugalingong lagda. Tinuod dako og kalainan ang balaod nga gilapas sa presidente ug nilang mga opisyal sa IBP, apan ang lintunganay mao nga sa dili ka pa manaway susiha una og maayo ang imong kaugalingon.
Wa ko mag-ingon nga husto si Arroyo sa iyang gihimo, apan ang pagpakig-abin gud sa IBP sa mga militanteng grupo nga alang nako maoy naghatag og kagubot sa nasud pun-an pa nga wa diay masubay sa ilang Constitution and By-Laws ang ilang gihimo nakahanaw sa kridibilidad ug pagtamod sa publiko sa ilang kahugpongan.
Kon dunay kalapasan nga nahimo ang mga opisyal sa IBP dinhi sa dakbayan tungod sa ilang pag-apil apil sa mga isyong politikanhon kinsa may moimbistigar ug mobadlong nila? Matud pa sa usa sa mga miyembro sa bag-ong nahulmang grupo nga ang board of governors sa IBP, apan ang pangutana andam ba sila nga moimbistigar sa ilang kaubang mga abogado?
Kinsa man usab ang mobarog nga complainant batok sa mga opisyal sa IBP nga nakalapas sa ilang constitution and by-laws? Akong gihagit ang mga sakop sa Cebu Lawyers for Unity and Brotherhood nga maoy mobarog nga complainant sanglit inyo na man nga gisugdan ang kawsa pagtul-id sa mga sayop sa inyong organisasyon.