Nahimo nakong prinsipyo sa kinabuhi nga dili magsaba unsay akong ambisyon hangtud nga dili kini matuman. Way bisan usa ang nahibawo nga gusto kong mahimong broadcast journalist ug motrabaho sa numero unong television network, ABS-CBN. Gawas sa akong inahan, way nakahibawo nga gusto ko nga mohupot og programa sa radyo pinaagi sa DYAB. Way nahibawo nga gusto ko nga mahimong talkshow host. Ako nang gihinay -hinay og butyag ang akong ambisyon sa dihang hinay-hinay na sab ning nahatagan og katumanan.
Ug karon, ikaw ang unang nakahibawo nga ambisyon sab diay nako ang magsuwat sa mantalaan. Pinaagi sa Banat News nahatagan og katumanan ang akong tinagu-ang pangandoy.
Sukad kolehiyo sa University of San Jose-Recoletos, kung diin ako nahimong news editor sa Forward Publication, karon pa ko mahibalik sa usa sa labing gamhanang porma sa pamahayag, ang print media.
Sa dihang nakigtagbo ko sa kadagku-an sa Banat News aron planohon akong column, wa' pa mi nahuna-huna-ang titulo. Matod sa mga kadagku-an, mao ni sagad nga problema nga ilang masugatan. Mahuman na lang ang tanan, ang titulo wa' pa. Sama sa telebisyon, mokabat sab og pila ka adlaw una mapaboran ang angayang titulo sa programa. Salamat sa akong kauban sa ABS-CBN NEWS nga si Vilma Andales nga maoy nihatag og mga titulo nga pwede nakong kapili-an.
KUMBATI! Ang kinabuhi nato ning kalibutana puno sa kumbati. Ang atong palibot puno sa kumbati. Ang administrasyong Arroyo bag-ong lang nahuman sa pakigkumbati sa mga tawong gusto mupukan sa pamunu-an apan wa' pa makasiguro kung hingpit na ba gyung napukan ang motibo batok sa rehimeng Arroyo. Ang mga taga oposisyon ug lider sa mga militanteng pundok nagsige pa'g kumbati pagpalagpot kang Mrs. Arroyo sa puwesto bisag gipasigarbo na ni pangulong Arroyo nga siya lang ang labing maayo nga mangu' ning maong nasud.
Ang pakigkumbati ni Mayor Tomas Osmeña sa isyu sa South Reclamation Project ug ang pakigkumbati sa lokal nga kagamhanan sa Talisay sa usa ka bahin sa SRP. Ang mga naluwas sa trahedya sa Guinsaugon, St. Bernard, Southern Leyte, padayong nakigkumbati ning labing ngitngit nga pagsuway nga niabot sa ilaha.
Ang pakigkumbati sa mga drayber alang sa dugang pletihan ug ang pakigkumbati sa mga mamumuo alang sa dugang suhulan. Ang pakigkumbati sa ubang mga grupo alang sa kalikupan, hustisya, kababayen-an, kalalakin-an, kabataan.
Ang pakigkumbati su'd sa pamilya, sa trabaho, ug labaw sa tanan sa atong tagsa tagsa ka kaugalingon.
Ang pakigkumbati ang labing lig-ong lakang nga himuon sa matag pagsuway nga mo-abot sa kinabuhi. Ning panahon sa grabeng pagpangilad, pamintaha ug pagbiay-biay, wa na'y igong lugar sa pagpa-ubos.
Ning yugto sa kalibutan nga wa kinahanglana ang mga tawong kuwang sa pagpakabana, paglihok ug pagtukaw, mas maayo nang mahibaw sa mga panghitabo aron maandam ang imong kaugalingon sa pakigkumbati.
Apan matod pa, di' ka magmada-ugon sa hagit sa kinabuhi kung mismo ang hagit sa imong kahiladman di' nimo pakigkumbatihan!