Nagka-awop na ang 'patriotism' diha sa kabatan-onan nga nagtungha sa mga unibersidad ug kolehiyo tungod sa walay tataw nga kursong magtukmod kanila pagtuon unsaon paghigugma ang nasud nga natawhan.
Walay laing kurso nga makatudlo sa uyok sa patriotismo ug nasyonalismo gawas sa ROTC. Dinhi itisok sa mga tinun-an unsaon pagpakigbatok sa mga kaaway sa higayon nga adunay mahitabong 'aggression' gikan sa gawas sa nasud.
Nabantayan usab nako nga milampos ang mga walhon pagtisok sa ilang mga pagtulon-an dinha sa mga kolehiyo ug unibersidad ug midaghan karon ang mga tinun-ang nag-martsa sa kadalanan ug nagsinggit sa pagpalagpot sa gobyerno.
Dili lang tingale ako ra, nakabantay usab tingale kamo nga ang kabatan-onan karon wala nay batasan ug wala nay disiplina.
Kanang gihisgutan nako nga sitwasyon sa mga tinun-an karon sa mga tunghaang tersiyaryo pipila lamang kana sa resulta sa pagpatuman sa Akta Republika 9163.
Kanang Akta Republika 9163 kun National Service Training Program maoy hinungdan sa tataw nga "kamatayon" sa ROTC sa mga kolehiyo ug unibersidad sa nasud.
Sa maong balaod, nahimo na lang "compulsory" ang ROTC sa mga tunghaan. Ang tinun-an makapili na sa tulo ka NSTP component: una ROTC, ikaduha Civic Welfare Training Service (CWTS), ug ikatulo ang Literacy Training Service (LTS).
Alang sa kasayuran sa tanan, sumala pang Philippine Star ug The Freeman columnist Bobit Avila, kanang gibuhat karon sa CWTS program sa mga tunghaan nga pagpanglimpyo sa mga plaza, karsada, pagbungkal og kanal, paghipos sa mga basura mao kana ang silot sa mga 'first offenders' sa mga gagmay'ng salaod sa Estados Unidos.
Sukad napasar ug napatuman ang NSTP, nalabwan ang ROTC sa CWTS.
Gipahimuslan sa tapulan nga mga tinun-an ang kahigayonan nga dili sila makapatupi, makapainit, makasul-ob og fatigue nga uniporme, makamartsa-martsa isip mga sundalo pinaagi sa pagpa-enrol sa CWTS.
Wala nila hunahunaa nga mas 'degrading' ug makauulaw ang manglimpyo sa plaza, kanal, ug karsada kay sa pagsul-ob og uniporme ug pagtagamtam sa kinabuhing sundalo diha sa ROTC.
Ang gradwado sa ROTC automatic nga mamahimong Reservist ug human sa gradwasyon adunay order sa Armadong Kusog nga mag-assign og serial number ug ranggo sa kadete. Sa CWTS, mahuman ang upat ka semester sa pagpanglimpyo, daw janitor o metro aid.
Ang gradwado sa ROTC mahimong mosulod sa ROTC Advance Training ug ang gradwado niini mahimo nga mosulod sa Armadong Kusog sa Nasud sa tumang kasayon.
Apan, maayong masayran nato nga nanghitabo kini tungod sa 'konsentidor' nga mga ginikanan. Kadtong mga ginikanan kaniadto nga dili gustong mainitan ilang anak, mosuborno sa mga commandant aron dili ilakip ilang anak sa martsa-martsa taliwala sa init.
Dihay nanghitabong hazing sa training sa mga aplikante sa mga opisyal sa pagka-cadet officers.
Apan may panultihon nga nag-ingong "ang pagputol sa ulo dili maoy tambal sa labad sa ulo."
Busa dili tambal sa mga isyung naglimin sa ROTC ang pagputol niini.
Ang tambal niini mao ang pag-amendar sa balaod ug pagbutang og bug-at nga silot ug estriktong proseso pagpatuman og balik isip mandatory sa ROTC.
Dili sulbad ang pagputol sa ROTC.
Ngano, wala ba diay mga ginikanan karon nga misuborno sa mga tunghaan kay dili nila gustong manilhig sa mga pampublikong lugar ilang anak?
Sa maong convention gibalik-lantaw sa mga tinun-an nga mga corps commanders sa mga tunghaan lukop nasud ang status karon sa ROTC human gipatuman ang NSTP law.
Apan ang labing mahinungdanong bahin sa maong convention mao ang panaghiusa sa Armadong Kusog sa Nasud ug sa mga ROTC commanders sa pag-awhag sa mga magbabalaod sa pag-review sa NSTP law ug pag-amendar niini aron mahimong haum sa kasamtangang panahon.
Sa wala pa ang maong convention, gihimo sa Headquarters 7th Regional Community Defense Group, Army Reserve Command ug 701st Community Defense Center ang press conference inubanan sa mga reservist sa Philippine Army mahitungod sa "himalatyong" status sa ROTC sa mga tunghaan.
Gitambungan kini nilang H7RCDG, ARESCOM group commander Col. Guillermo Luyao Jr., Philippine Army Reservist Association-7 Foundation president Col. Cefererino Layao, 701st CDC commanding officer Major Samson Deles, Ready Reserve Battalion executive officer Major Richard Sison, ug laing mga opisyal sa ARESCOM.
Giduso sa mga opisyal sa ARESCOM ang pagpabalik sa ROTC program sa mga tunghaan.
Kun akoy pabut-on, maayong i-abolish kanang Sangguniang Kabataan. Wala gyud nay pulos. Nagtudlo ra kana og pangurakot ug partisanship sa kabataan.
Pila ka bilyon ang na-usik sa SK program sa nasud nga walay maayong bunga ngadto sa kabataan? Ang labing maayo ihapak sa ROTC program kanang budget nga nausik sa SK, ipamalit og tinuod nga armalite aron pagunitan atol sa mga ROTC training unya, aron dili na mangasugsog ang mga kadete sa kahoy nga gihulmang Garand rifle ug ilibre sa ilang mga uniporme, bala para sa firing, ug gasto sa bivouac ug camp out, lakip na ang mga civic welfare activities sama sa pagpananom og kahoy.
Ibalik nato ang ROTC!