Kadalanan gihimong bodega sa mga soft drinks company

Ambut kinsa o unsa nga opisina sa gobiyerno, ang atong sultihan ini nga medyo waa may magpakabana ini nga sitwasyon sa atong kadalanan.

Sige tag reklamo sa ka-trapik na kaayo sa atong dakbayan. Bisag unsang orasa, bisag asa sa city proper, ma-reclamation area, ma-Banilad-Talamban, ma-Pardo o ma-Labangon, trapik na gyud kaayo. Ilabina dinhi sa sentro sa siyudad.

Ug samtang mao kini ang sitwasyon, waay gihimo ang atong mga otoridad aron kahupay-hupayan ang trapiko. Nagpalapad ta sa uban natong kadalanan, apan, waay epekto tungod kay gihimo man ning mga parkingan, gihimong baylehan, tindahan, vulcanizing shop ug ang dakung kangil-ad kay gihimong bodega ug mga loading ug unloading area sa mga dealer sa mga soft drinks.

Ambut nganong gipasagdan lang ni sa atong gobiyerno. Dagku ra ba kaayo ang mga truck sa maong mga kompaniya sa soft drinks. Panahon sa pag-deliver, diha lang dapit sa V. Rama, ma-sirhan gyud ang usa ka lane sa dalan.

Ambut kon sa Citom ba ni nga concern, sa LTO ba, sa Public works ba, sa mga metro aide ba, sa general services ba, sa OBO ba, sa mga konsehal ba, sa barangay captain ba, sa bise mayor ba, o sa mayor ba.

Nganong waa man lang sila magtagad ini? Kining maong talan-awon, atong makita sa nagkalainlaing dapit sa atong dakbayan. Ug nakadugang kini sa problema sa trapiko sa atong siyudad.

Unsa man, maghuwat pa ta sa Asean summit, aron ka-limpiyohan nato ang atong kadalanan from these hazards obstructions?