Tinuod ang sulti ni Senador Richard Gordon, gobernador sa Philippine National Red Cross (PNRC): Ang angayng ibutang sa state of emergency mao ang mga dapit sa Leyte nga hangtod karon nag-atubang sa hulga sa bangis nga pagdahili sa yuta. Tuguting mangahas ko pagpuno: Di ang Metro Manila nga maoy lingkoranan sa gahom sa mga politiko nga di ganahan ug sa tanang tilimad-on nahadlok nga manubag sa makiangayong mga pangutana giunsa pagdaog ang eleksiyon sa 2004.
Human nitahan ang lokal ug langyawng rescuers sa kahigayonan nga duna pay buhi sa mga biktima nga nalubong sa nahugno nga bahin sa bukid sa Kan-abag nga nitabon sa tibuok Barangay Guinsaugon sa St. Bernard, Southern Leyte, ug hinaot nga tungod lang ni sa pagsigeg uwan sukad niadtong Sabado, naluya nang pagpangita sa mga biktima. May sukaranan ang kabalaka nga inanay nang makalimtan sa kinabag-an ang dakong mga panginahanglan sa mga biktima sa katalagman tungod lang sa nalab-as sa ilogay sa bukog sa kaulohan.
Salamat ni Barangay Kapitan Joel Garganera sa Tinago, nga taga St. Bernard. Iyang gidasonan ang hagit sa among Area Manager sa ABS-CBN, Tata Cinco-Sy, nga di lang mi kutob sa paghatod sa nagbaha nga hinabang sa mga Sugbuanon ngadto sa mga bakwet. Ang iyang gisugyot nga scholarship sa mga tinun-an nga nawad-an sa mga ginikanan tungod sa katalagman gipunit sa KBP Radiothon sa niaging semana. Si Garganera, uban sa tabang ni Mayor Maria Lim sa St. Bernard, maoy nihimo sa unang lakang pagsubay ug pag-ila sa mga tinun-an.
Nia sila magtungha sa mga kolehiyo ug mga unibersidad sa Sugbo, sa atong kaugalingong tugkaran. Di na ta kinahanglang motabok pa og lawod pagtabang nila. Kitay naa sa labing maayong posisyon sa pagluwas nila. Human nawagtang di lang ang ilang barangay, bay, kabtangan ug pamilya, maglisod na sila pagtiwas sa ilang mga kurso kon di nato sila agakon.
Nawa nang ilang karon, ato pa bang hikawan sa ilang ugma?
Sa 15 ka tinun-an, pito ang nagtungha sa University of the Visayas (ang managsuong Jonmar, Joniel, Josie ug Eduard Esclavosa, Thelma Libaton, Alfred Sibunga ug Elizabeth Celmar Ong), tulo sa University of Cebu (Myren Celmar, Romeo Esguerra Jr. ug Jaycee Ylagan), duha sa Southwestern University (ang managsoong John Alister ug Jo-Anne Cabug-os Letigio) ug tagsa sa Cebu Doctor's University (Lorelie Yeth Binondo), University of San Carlos (Jewelson Siona) ug Besavilla Engineering Review Center (Paul Esguerra).
Si UV Executive Vice President Jose "Dodong" Gullas pormal nga nilusad sa kampanyang "Bunga sa Gugma" pagtigom sa mga hinabang di lang alang sa mga tinun-an kon dili alang sa tanang biktima sa Guinsaugon.
Hinaot nga ang ubang eskuylahan mobukas sab sa ilang kasingkasing ngadto sa nailo nilang mga tinun-an.
Email: leo_lastimosa@abs-cbn.com