Libreng produkto kuno

Maghisgot na gani og "libre" motingkag gayod dayon ang atong mga dalunggan. Kinsa goy dili mahinangop kon adunay butang nga ipanghatag nga "libre" karong panahona nga mahal na kaayo ang bili sa mga palaliton? Mao nga dako na kaayong butang alang kanato kun adunay "libre" nga ipanghatag.

Tungod lagi kay ganahan man kaayo kitag libre, gipahimuslan sab kini sa mga badlongon sa katilingban. Adunay mga badlongon nga misagop niining maong estilo sa pagpasalir sa ilang modus operandi. Manghatag kuno silag libreng produkto.

Usa ka magbabasa niining ubos kong lindog mi-text kanako mahitungod niining maong modus operandi. Ang iyang text nagkanayon: "Good day. Naa koy isumbong nimo about sa mga tawo nga manghatag og flyers. Moingon sila nga naay libreng produkto nga ipanghatag. Unya manghatag sad sila og lucky numbers. Pero ilad ra diay kay pabayron man diay ta sa kadugayan. Unya mangayo silag kuwarta para kuno ibayad sa pagtawag sa long distance aron mogawas ang numero sa lotto nga 3 digit nga ilang gihatag. Pabayron pa gyod ta aron mabawi ang bill o kantidad sa tambal nga ilang gipanghatag. Manghadlok pa gayod sila sa mga tawo. Kita intawon kay manimpalad ug mamasin sad, mangayo sad intawon og numero aron modaog sa lotto." -- 0906-8290922 (Sent: Jan. 28, 2006:20:19:03)

Kini bitaw'ng taktika sa ubang mamaligya og produkto nga sa sinugdanan patuohon ta nga libre apan sa himan-himan pabayron diay, matawag sab kini nga pangilad. Nganong dili na man lang nila sultihan daan ang mga tawo nga pabayran nila ang ipang-apod-apod aron dili magsalig ug maglaom ang maong mga prospek nga libre ang mga produkto nga ilang nadawat?

Labaw nang dakong binuang ang pagpanghatag og numero sa lotto unya mangayo og kuwarta aron pagtawag sa long distance. Kinsay tawgan? Ang taga PCSO? Kataw-anan! Bisan mapudpod pa ang imong mga tudlo og dinayal sa telepono, dili gayod mogawas ang imong numero kon wala kini mahilakip sa programa sa mga kombinasyon sa numero nga pagawason. Walay labot ang PCSO niining tinuntoha. Binuhatan lang kini sa mga badlongon sa katilingban.

* * *

(Sumbong ug reklamo? Text sa 0910-8105522)